Kutxabankeko hitzarmen kolektiboaren negoziazioan EAJ-k, CCOO sindikatua solaskide eta konplize bezala izanda, espainiar esparruan aldeko apustua egin duela salatu zuen atzo LAB sindikatuak. LABen ustez egin duten apustua euskal sindikatu gehienen nahiaren aurka doa eta talka egiten du alderdi horrek egin dituen beste adierazpen batzuekin, non lan harremanen euskal esparrua nahi duela adierazi duten. Ildo horretan, ezagunak dira ere EAJren VI. Batzar Nagusian euskal esparru baten alde hartutako erabakiak.
LABen ustez hori ez da euskal gizarteari krisitik ateratzen laguntzeko, industria- ehuna sendotzeko, enplegua sortzeko eta gure gazteen alde egiteko bidea. Hori dela-eta, EAJk, PPrekin dituen konpromisoekin lotuta, hartu duen espainiar apustua salatu nahi izan du.