RTA enpresako langileek gaur planto egin dute azken asteetan eman diren istripuen harira. 2026An iada 3 istripu eman dira. Datu horrek agerian uzten du ez gaudela gertakari isolatu baten aurrean, baizik eta prebentzio sistemaren hutsune larri eta egiturazko arazo baten aurrean.
Aspalditik salatzen ari gara bide desberdinetan enpresan ez direla Lan Arriskuen Prebentziorako Legeak ezartzen dituen gutxieneko neurriak betetzen. Segurtasun protokoloak ez dira behar bezala aplikatzen, baliabide material eta pertsonalak eskasak dira, eta prebentzioaren kultura bigarren mailan uzten da ekoizpen-helburuak lehenetsiz.
Horregatik, gaur kontzentrazioa egin dugu enpresaren ate aurrean, lan baldintza seguru eta duinak aldarrikatzeko. Argi eta garbi adierazi dugu: osasuna ez da negozio bat. Ekoizpena eta irabazi ekonomikoak ezin dira langileen segurtasunaren gainetik jarri.
RTA enpresako zuzendaritzari honako hau exijitzen diogu:
- Lan arriskuen ebaluazio integrala eta eguneratua, langileen ordezkariekin adostua.
- Segurtasun neurri eraginkorrak eta berehalakoak ezartzea, beharrezko inbertsio ekonomikoa eginez.
- Prebentzio delegatuekin eta langileen ordezkariekin benetako negoziazioa irekitzea.
- Istripuen inguruko gardentasuna eta informazio osoa bermatzea.
Benetako neurriak hartu ezean, langileek ez dute baztertzen mobilizazioak areagotzea, lanuzte partzialak edo osoak barne. Ez dugu onartuko gure eskubideak urratzea eta gure osasuna arriskuan jartzea.
Azkenik, elkartasuna eta babesa eskertu nahi diegu mobilizazioarekin bat egin duten guztiei. Borroka hau ez da soilik RTA enpresakoa; lan baldintza duin eta seguruak bermatzearen aldeko borroka kolektiboa da.
Lan baldintza seguruak orain!
Prekarietaterik eta arriskurik ez!