Gaur, abenduaren 26, Ertzaintzaren ezinbesteko laguntzaz, Batz-Aralucen dagoen makinaria atera dute bertako 141 langileen etorkizuna kinka larrian utziz. LABek irmoki salatzen du gertatutakoa eta proiektu industrialaren aldeko borrokarako deia egiten du. Batz-Araluceko langileek euren etorkizunaren defentsan burutzen ari diren greban, euren eskubideak urratuak ikusi dituzte berriro. Izan ere, gaurkoan, lantokiak etorkizuna izan dezan ezinbestekoak diren trokelak atera dituzte poliziaren laguntzarekin.

Erabaki hau edozein kasutan larria den arren, are larriagoa da kontuan hartzen badugu erabakia hartu duena Batz-Araluce jabe den Batz kooperatiba dela. Ustez bestelako baloreak defendatzen dituen enpresa batek ezin ditu edozein enpresa kapitalistak hartuko lituzkeen erabaki berak (edo okerragoak) hartu.

Salatu nahi dugu, era berean, langileen kontrako erasoak atzetik datozela, eta horren adibide argiak direla langile eta sindikatuetako kideen kontrako salaketak eta lan ikuskaritzak bidegabetzat jo zuen enpresa itxiera.

LABek greba eskubidea urratzeagatik salaketa sartuta dauka eta orain salaketa hau zabaltzea aztertuko dugu. Dena den, LABentzat auzi hau judizializatzea eta epaileen esku uzteak ondorio txarrak ekarriko lizkioke auzian nahastuta dagoen mundu guztiari, bereziki Batzi.

Borondaterik balego, bestelako irtenbideak lortzeko aukera dagoela uste du LABek. Irtenbide hau Batz eta Batz-Aralucek sortzen duten taldearen baitan eman behar da, eta Mondragon Taldeak interesik ez balu, inbertsore baten etorrerak lagunduta. Langileen gaitasunak, eta datorren urterako aurrikusita dagoen lan kargak horretarako aukera ematen dute. Horregatik, Batzi eta Mondragon Taldeari, jarrera inposatzaileak baztertu, euren ardura onartu eta Arratiarentzat ezinbestekoa den etorkizun industrial baten alde elkarlanerako deia egiten diegu. LAB prest dago horretarako.

Bitartean, LABek orain arte bezala langileen greba eta enpleguaren aldeko borroka defendatuko ditu eta Arratiako bizilagunei euren elkartasuna adierazteko deia luzatzen diegu.