LABek Arcelor Mittaleko zuzendaritzak Sestaoko lantokirako egindako proposamena baztertu du, proposamena onartzeak lantokiaren itxiera definitiboa suposatzen duelako. Zuzendaritzak azken orduko aldaketa txikiak sartu dituen arren, proposamenaren ardatz nagusiak berberak dira: plan sozial prekario bat (12 orduko lanaldia barne) eta plan industrial prekario bat, ekoizpen maila barregarriekin.
Ez dugu ulertzen nola aurkeztu dezaketen instalazioak kaltetuko dituen plan bat, galera handiak ekarriko dituena plantaren erabilera baxuagatik. Zentzuzko azalpen bakarra, trantsizio epe bat proposatzen ari direla da, ekoizpenaren deslokalizazio definitiboa egin arte.
Aurkeztu genuen bideragarritasun planak enplegu zuzen zein azpikontratatua bermatuko dituen proiektu industrial batetarako oinarria izan daitekela uste dugu. Produktuak, langileen gaitasunak eta merkatuak horretarako aukera ematen dute.
Horixe defendatzen jarraituko dugu, horregatik jarraitu behar dugu borrokan. Eta datorren astean Arcelor Mittalen plana onartu eta itxieraren oinarriak jarri edo borrokan jarraitzeko hautua egin behar badugu, LABek bigarrenaren alde egingo du.
Instituzioei ACBren itxiera eragotzi eta alternatiba ezberdinen alde lan egiteko eskatzen diegu, beharrezkoa balitz Sestaoko Altzairutegia berriz jabetza publikokoa izateraino.