LABek eskaria erregistratu du Bizkaiko Foru Aldundian Bizkaibuseko kabinak berriro zabaldu behar dituztenean. Sindikatuak eskatu du “modu prebentiboan eskuz ordaintzea bertan behera uztea”, ohikoa izaten ari den bezala, momentuz, autobusa ordaintzerakoan.
Aipatutako eskaria beharrezkoa da, COVID-19aren kutsaketa eta hedapena eragozteko modurik onena arriskua ahalik eta gehien gutxitzea delako eta kobraketa kreditu txartelaren bidez egin baitaiteke.
Txartel bidez ordaintzeko datafonoak jartzea, 2013 eta 2014an Bizkaibusen egondako gatazkan zehar sindikatuek eskatutako zerbait da, eta ordutik hona Aldundiak ez ditu Bizkaibuseko kabinetan ez hau eta ez beste hainbat hobekuntza martxan jarri. Gaur egun, asko dira zerbitzu hau ez duten kabinak, hortaz, berriz martxan jartzen direnerako datafonoak izatea exijitzen dugu.
Langile eta erabiltzaileek ez dituzte Aldundiaren geldotasunaren ondorioak ordaindu behar. LABek uste du kabinak berriro zabaldu behar direla, baina segurtasun neurri guztiekin, eskuz egindako ordainketek birusaren hedapen eta kutsaketan lagundu baitezakete.
Zertarako balio du maskara edo eskularruak erabiltzeak, birusa kabinetan geratzen diren txanponetan baldin badago? Zertarako balio du maskarak erabiltzera behartzeak gero eskuz ordain badezakegu, birusa izan dezaketen txanpon eta bileteak gure boltsikoetan sartuz?
LABek espero du, autobusetan eskuz ordaindu ezin daitekeen modu berean, bere eskaria onartua izatea. Horrela ez bada, eskuz ordaintzeagatik egon daitezkeen kutsatzeak diruz ordaintzea ahalbidetu dutenen erantzukizuna izango dira.