LAB sindikatuak bere elkartasuna eta babesa erakutsi nahi die Artatzan gaur hildako langilearen familiari eta gertukoei, eta Urederra Kanpineko bere lankideei. Urtea hasi zenetik, bederatzi langile hil dira jada Euskal Herrian. Iaz 15 lagunek galdu zuten bizia Nafarroan, horietako bi altueratik erorita.
Ia lan istripu guztiak saihestu daitezke, eta, altueran gertatzen direnean, guzti-guztiak ekidin daitezke oinarrizko segurtasun neurriak hartuz gero.
Hildako langileak 55 urte zituen eta mantenu lanak egiten ari zen Urederra Kanpinean, garabi kamioi batekin. Oraindik ezagutzen ez diren arrazoiengatik, lanean ari zen saskia hamar bat metroetatik erori da.
Atari irekian egiten diren lan hauek prekarietatea handiarekin egin ohi dira. Hori ez da berria, zoritxarrez. Presak, lan erritmoak, segurtasunik gabeko makineria eskasa, batzuetan zaharkitua… halako arrazoiek prekarietatea handitzen dute, eta, ondorioz, gertakari lazgarriak etortzen dira.
LAB sindikatuak berriro salatu nahi du ez nahikoak direla aplikatzen diren prebentzio politikak eta hauen gainean egiten den jarraipena. Zenbakiak mahai gainean daude; krisi garaitik gora egiten ari dira lan istripuak, etengabe.
Jakin badakigu langileen osasunak ez dituela kezkatzen patronala eta erakundeak, euren etekina besterik ez baitute kontutan hartzen, prekarietatearen aurrean beste alde batera begiratuz eta hainbeste istripu, elbarritasun eta pobrezia eragiten duen esplotazioa ukatuz.
Instituzioek ez dituzte enpresak presionatzen segurtasun planak gauzatu, zuzendu edo egoki aplikatu ditzaten. Ez dute zaintzen ere enpresa nagusia eta azpikontraten arteko prebentzio koordinazioa, eta, eginez gero, dirua biltzeko helburuarekin da.
LAB sindikatuak urteak eman ditu Lan Ikuskaritzako eskuduntzak Nafarrora pasa daitezen eskatzen eta Osasun Publikoko Nafarroako Institutuarentzat eskuduntza gehiago exijitzen, beti ere prebentzioa eta jarraipena ziurtatzeko eta, beharrezkoa denean, zigorrak jar ditzaten lan istripuen odolustearekin eta prekarietate fokoekin amaitzeko. Esan beharra dago prekarietate foko hauek ez direla bakarrik eraikuntza eta mantenu zerbitzuetan ematen, gainontzeko sektoreetan ere oso hedatua baitago prekarietatea, lan istripuen estatistiken gorakada iraingarria lekuko.