LAB sindikatuak hurrengo mahai negoziatzailera bere ekarpenak eraman nahi ditu. Derrigorrezkoa da, gure ustez, langileek egindako borrokari bere balioa ematea eta horretarako kaleratzeak modu eraginkor batean ekidituko dituen testu bat adostu behar da. Gure ekarpenak jasoz gero, LABek berriro aztertuko luke lan hitzarmenaren akordiora batu edo ez. Argi dago gaur egungo edukiak ikusita, akordioan gure sinadura ikustea oso zaila izango dela.
Lehenik eta behin, LAB sindikatuak Gizarte Ekimeneko langile guztiak egindako borroka eredugarriagatik zoriondu nahi ditu. Momentu eta aukera hauetara iristea ez litzateke posible izango zuen borrokarik gabe! Gora langile borroka!
Pasa den azaroaren 8an goizaldean ELA, Steilas eta CCOO sindikatuek Kristau Eskola Patronalarekin akordio bat sinatu zuten, deituta zegoen hilabeteko greba deialdia bertan behera utziz. Aldiz, LAB sindikatuak ez zuen sinatu egunean bertan prentsa oharren bidez azaldutako arrazoiengatik, besteak beste. Aste honetan zehar, LABek, EAEko 3 lurraldetan egindako batzarretan, bere afiliazio eta ordezkaritzarekin denbora izan du akordioa sakonago aztertzeko. Akordiaren azterketa pausatuago honen ondoren, puntu batzuetan aurrerapausuak egon badaudela esan nahi dugu.
Tamalez, lan hitzarmen honetarako gai izarra den langileen birkokapenerako edukiak oso eskasak dira eta ezer gutxi aldatzen dute gaur egun Gizarte Ekimeneko ikastetxeetako langileen egoera. Jaiotze tasaren jaitsiera dela eta matrikulazio jaitsierek ekarri ditzaketen kaleratzeak ekidetzea izan da borrokaldi honen helburu nagusietako bat. Aurkeztu zaigun akordioaren edukiak ikusita, kaleratzeak egoteko arriskua bere horretan mantentzen dela esan behar dugu.
Kezka handiz ikusten ari gara sindikatu sinatzaileen poza. Gure ustez enplegua mantenduko denaren inolako bermarik ez da lortu; lortu egin den bakarra soberan dauden langileez osatutako lan poltsa bat da. Patronalak hartu duen konpromiso bakarra, erretiroagatik sortzen diren bakanteak langabezian gelditzen diren langileen artean banatzea da. Horrek ez du inolaz ere ikastetxe hauetan egon daitekeen enplegu galera ekiditzen. Hori dela eta, sinatutako edukiak guretzat ez nahikoak dira.