LAB sindikatuan ez dugu babesten la Casa de Misericordiak aurkeztutako proposamena, eta CCOO eta UGT sindikatuak kritikatzen ditugu, Iruñeko zezen-plazako langileen lan-baldintzak hobetu beharrean, finkatutako eskubideen galera eta baldintzen okertzea dakarren hitzarmena onartzeagatik.
Akordio partzialak lortu dira hainbat arlotan negoziazioan zehar, hala nola hitzarmenaren indarraldian, ordainsarietan, aseguru indibidualean eta osagarri ekonomiko jakin batzuetan. Hala ere, LABen ustez, azken proposamenak “langileen eskubideei eragiten dieten kontu onartezinak mantentzen ditu”.
Besteak beste, langileentzako doako sarreren erregimena aipatu behar da. LABen ustez, Casa de Misericordiaren proposamenak alde sozialak planteatutako hobekuntzak baztertzeaz gain, indarrean dagoen hitzarmenean jasotzen diren doako sarreren kopurua murrizten du. Aldaketa honek langileentzat jada finkatuta dauden eskubideen galera dakarrela uste dugu, eta zalantzan jartzen dugu hitzarmen kolektibo berri batek lortutako eskubideak mugatzeko balio dezakeen, horiek handitu edo hobetu beharrean.
Gainera, proposamenak kategoria profesional jakin batzuetara mugatzen du lanpostu hutsak betetzeko aukera, eta horrek desparekotasun-egoera sortzen du gainerako langileekiko. Era berean, testuak justifikatu gabeko absentziengatiko zigorrak gehitzen ditu, eta ez du jasotzen langileen legezko ordezkaritzari diziplinazko jarduera jakin batzuen berri ematea.
LABetik gaitzetsi egiten dugu negoziazioan zehar erantzunik gabe geratu zirela hainbat aldarrikapen, alegia, plazako segurtasunarekin, ordezkarien jarduera sindikalarekin, sailkapen profesionalarekin, kategorien parekatzearekin, kolektibo jakin batzuen soldata-hobekuntzarekin eta gaixotasun arruntetik eratorritako aldi baterako ezintasun-egoeretan soldataren % 100eko osagarriarekin lotutakoak.
Horrez gain, Casa de Misericordiak proposamenak gehitu ditu negoziaziorako plataforma bateratutik at, adibidez, aurreko hitzarmenean jasotako mulillero kopurua murriztea edo kategoria jakin batzuetan laneko arropa gutxiago ematea.
LABen arabera, neurri hauek egungo baldintzekin alderatuta atzerapausoa dakarte. Negoziazio kolektiboa dauden eskubideak murrizteko edo segurtasunarekin, lanaren antolaketarekin eta langileen baldintza ekonomikoekin lotutako aldarrikapenak erantzunik gabe uzteko erabiltzearekin ez gatoz bat. Hortaz, ez dugu Iruñeko Zezen Plazako hitzarmen kolektiboa sinatu.