Astelehenean Bilbon egin bezala, Euskal Herriko Eskubide Sozialen Kartako ordezkariok, pentsiodunen, gazteen eta feministen hainbat kolektiborekin batera, urtarrileko bigarren hamabostaldirako deitutako greba orokorraren berri eman dugu Iruñean. Hain zuzen ere, datozen asteetan lan, pentsio eta bizitza duinaren alde bultzatuko dugun dinamika biribiltzeko greba izango dela jakinarazi dugu.
"Zertarako greba orokorra? Prekarizazioari aurre egiteko, lan, pentsio eta bizitza duinaren alde", azaldu du Garbiñe Aranburuk Iruñean, astelehenean Bilbon egindako agerraldiaren ildoan.
Hain justu, datozen astean gauzatuko dugun dinamika mobilizatzailearekin mugarri bat jarriko dugu hainbat borroka indartzeko: pentsiodunena, lantokietakoak, mugimendu feministarena, gazteena… borroka horiek guztiek bizitza duin baten aldeko borroka kolektibo berean bat egiten dutelako. Hala, LABeko idazkari nagusiak mezu bat bidali die fase ekonomiko berria dela-eta atzerapen gehiago inposatzeko asmoa duten horiei: hori onartuko ez duen gehiengo sozial aktibo bat dago Euskal Herrian: "Ez dugu onartuko. Grebara eramaten gaituzten aldarriak errealitate bihurtzeko borrokatuko dugu".