Egoera honetan onartu da EAEko Polizia Legea, LABek defendatzen duen udaltzain ereduaren guztiz kontrako norabidean doan legea alegia. Hau guztia dela eta, argi dago udaltzainen kolektiboa babesgabetasun eta ezegonkortasun egoera larrian dagoela. Hainbat sindikatuk egoera honetaz baliatu nahi dute hau langileei mezu itxaropentsuak bidaltzeko. Gure ustez, erabat salagarria da bizi dugun egoera larri hau espektatiba faltsuak sortzeko erabiltzea. Ez da onargarria behin-behineko udaltzainen artean “zu geldituko zarelaren“ mezua zabaltzea, ezegonkortasun egoerak baliatuz. Aski da, ez jolastu gure behin-behineko lankideen etorkizunarekin!
Egoera zein den ikusita, LAB Sindikatutik honakoa adierazi nahi dugu:
• Udalez-udal lan eskaintza publikoak martxan jartzeko unea da, Udaltzaingo plantilen dimentsioak aztertuz, herritarren beharrak gain hartuta zerbitzu publikoaren kalitatea handituz.
• Eusko jaurlaritzak bultzatzen dituen deialdi bateratuak ez dira gure ustez udaltzainen integraziorako eredu egokia. LABk herritarrekiko hurbiltasunean eta integrazioan oinarritzen den udaltzain eredu bat defendatzen du. Deialdi bateratuek ez dute inolaz ere horretan laguntzen.
• Lanpostuak kontsolidatzeko prozedurak langileen ordezkariekin adostu egin behar dira. Gainontzeko zerbitzu publikoetan bezala, kalitatezko udaltzain zerbitzu bat defendatzen dugu, gertutasunean eta berdintasunean oinarritua. Ez dezatela agintariek egoera hau erabil aspaldian ezarri nahi duten polizia eredua gure herriko kaleetara ekartzeko.
Udaltzaingo demokratikoa, euskalduna eta herritarraren bidean, LABek lanean jarraituko du.