Otsailaren 24, 25 eta 26an deitu du grebara LABek, enpresei negoziazioari berrekiteko eskatzeko eta langileekin dituzten zorrak ordaintzeko, batetik, eta Eusko Jaurlaritzako Hezkuntza Sailari modu erreal eta eraginkorrean negoziatu dezan exijitzeko, bestetik.
Gaur, LABek jakinarazi nahi du EAEko eskola publikoetako jangeletako langileek mobilizazioak hasiko dituztela, jasanezina bihurtu den eta, erantzunik eta konponbiderik gabe, denboran luzatzen ari den egoera baten aurrean.
Hitzarmen kolektiboaren blokeoaz ari gara, jada itundutako soldata-igoerak ez aplikatzeaz eta funtsezko gaietan (ratioak, funtzioak eta lanaldiak, esaterako) erabateko aurrerapenik ez egoteaz, alderdi horiek zuzenean eragiten baitiote langileen egunerokotasunari eta eskola-jangelen funtzionamenduari.
Egoera hori ez da berria, baina negoziatzeko borondaterik ezak larriagotu egin du, bai enpresen aldetik, bai arlo horretan eskumen zuzenak dituzten Eusko Jaurlaritzako Hezkuntza Sailaren aldetik.
Alde batetik, LABek patronalari eskatzen dio berehala negoziatzera esertzeko eta langileei ordaintzeko adostuta dauden soldata igoerak, hitzarmenean bertan jasotako eskubidea baita, eta sistematikoki urratzen ari dena.
Bestalde, Eusko Jaurlaritzako Hezkuntza Sailari eskatzen dio behingoz dagokion erantzukizuna bere gain hartzeko eta negoziatzera esertzeko, ratioak, funtzioak eta lanaldiak arautzen dituen araudia aldatzeko. Izan ere, araudi horrek ez die erantzuten ez ikastetxeen egungo errealitateari, ez zerbitzu publiko horri eusten dioten langileen benetako beharrei.
LABek irmotasunez defendatzen du kalera ateratzeko beharra. Erabaki horrek langileek beraiek behin eta berriz adierazi digutenari erantzuten dio, bai batzarretan, bai lantokietara egindako bisitetan. Langileak nekatuta daude bete gabeko promesekin, etengabeko atzerapenekin eta beren lan baldintzak nola okertzen diren ikustearekin, haien eguneroko ahaleginari eta konpromisoari esker zerbitzuak funtzionatzen jarraitzen duen bitartean.
Horregatik guztiagatik, LABek grebara deitu du otsailaren 24, 25 eta 26rako EAEko eskola publikoetako jangeletan. Greba deitu du enpresei eskatzeko negoziazioari berriro ekin diezaiotela eta langileei zor dizkieten zenbatekoak ordain diezazkietela, eta Eusko Jaurlaritzako Hezkuntza Sailari exijitzeko beste aldera begiratzeari utz diezaiola eta eser dadila modu erreal eta eraginkorrean negoziatzera ratioei, funtzioei eta lanaldiei buruz.
LABek azpimarratu nahi du, gainera, gatazka honek ez diela eskola-jangeletako langileei bakarrik eragiten, baizik eta eragin zuzena duela ikasleei ematen zaien zerbitzuaren kalitatean. Horregatik, dei egiten dio hezkuntza komunitate osoari aldarrikapen horrekin bat egin dezan eta Eusko Jaurlaritzari araudi aldaketa eska diezaion. Izan ere, eskola jangeletako langileentzako lan baldintza duinak defendatzea ikasleentzako kalitatezko zerbitzu publiko segurua eta egokia defendatzea ere bada.
Amaitzeko, LABek, hitzarmen honetan gehiengoa duen sindikatua den aldetik, lanean jarraituko du gainerako sindikatuek mobilizazio hauekin bat egin dezaten eta batasun sindikala berreskura dadin. Izan ere, batasunetik eta ekintza kolektibotik bakarrik defendatu ahal izango dira indarrez EAEko eskola publikoetako jangeletako langileen lan eskubideak eta bermatu ahalko da etorkizun duina sektore honentzat.