Zipreren batasunaren eta autodeterminazioaren aldarrikapenarekin bat egin du Igor Arroyo LABeko koordinatzaile orokorrak, Munduko Federazio Sindikaleko kide den zentral sindikalaren kongresuan. Horrez gain, sindikatuak langileengana eta sektore prekarioenetara gerturatzeko beharra eta mugimendu sozialekin aliantzak egitekoa nabarmendu ditu.Â
Abenduaren 4an eta 5ean Nikosian egin du PEO zentral sindikalak bere kongresua. 1941ean sortua, PEO Zipreko zentral sindikal nagusiena da, eta garrantzi handia du LAB kide den MFS Munduko Federazio Sindikalean: PEOko idazkari nagusi izandako Pambis Kyritsis da MFSko egungo burua eta nazioarteko erakunde horren bulego nagusia Nikosian dago kokatua.
Nazioartetik hainbat herrialdetako gonbidatuak bertaratu dira kongresura; besteak beste, Txina, India, Palestina, Grezia, Italia, Portugal eta Galizakoak. Euskal Herriko ordezkari gisa, Igor Arroyo LABeko koordinatzaile orokorrak hartu du parte. LABek eta PEOk harreman estua dute aspalditik, eta, bakoitzak bere errealitatea izanik ere, estrategia sindikalari dagokionez irizpide asko partekatzen dituzte.
PEOko 500 ordezkarik hartu dute parte kongresuan, eta Sotiroula Charalambous hautatu dute berriz ere idazkari nagusi. Langileon lan eta bizi baldintzen aldeko klase borrokarekin batera, Zipreren batasuna eta autodeterminazioa aldarrikatu ditu hark. Izan ere, 1974an Turkiak iparraldea armaz hartu zuenetik, uhartea erdibituta dago. PEOk estatu konfederal burujabea aldarrikatzen du, uhartean diren bi komunitate nagusien (greziar kulturakoa bata, eta turkiar kulturakoa bestea) elkarbizitza ahalbidetuko duena. Batasunaren aldeko aldarrikapenak Zipreko langileen artean duen sostenguaren erakusgarri da sindikatu turkiar-zipretarren ordezkari den DEV-IS kongresuan presente egon izana eta hitza hartu izana.
Kongresuaren bezperan egindako nazioarteko konferentzian, Igor Arroyo mintzatu da LABen izenean. LABek Zipreren batasunaren eta burujabetzaren aldarrikapena gertu sentitzen duela adierazi du Arroyo, Euskal Herrian ere herri borondatearen ondorio ez baizik kanpo potentzien erabakiaren ondorio den muga baitago ezarria. Era berean, klase borroka indartzeko bi ideia nabarmendu ditu: batetik, sindikatuak langileengana gerturatzeko ahalegina, bereziki sektore prekarioenetara; bestetik, mugimendu sozialekin (hala nola feminismoa, ekologismoa edo antirrazismoa) elkarlanean aritzearen garrantzia, faxismoaren gorakadari aurre egingo dioten aliantza zabalak sortuz.