Atzo beste lan istripu hilgarri baten berri izan genuen, kasu honetan GRUSAR LOGÍSTICA Y DISTRIBUCIÓN enpresako (AMAZONen azpikontratako) 39 urteko D.J.G. langilea. Hesirik gabeko trenbide-pasagune batean gidatzen ari zen furgoneta trenak harrapatu zuenean, Zallan. Ditugun informazioen arabera, langileak trenbidearen bi aldeetan egin behar zituen banaketak, harrapaketa gertatu zen puntuan, hain zuzen ere.
LABetik gure babes eta elkartasunik zintzoena adierazi nahi diogu familiari, hildako langilearen lankideei, eta oro har, langile klase osoari.
2025 urtean, urtarriletik hona, gutxienez 58 langile hil dira beren lanpostuetan edo lanpostuengatik; 10 Araban, 13 Bizkaian, 13 Gipuzkoan, 1 Iparraldean eta 19 Nafarroan (baita 2 kanpoan ere)
Istripu hau ez da kausala, Amazonek bultzatutako lan harremanen eredu bati erantzuten dio, lan erritmo altuetan, presioan eta kontrolean oinarritzen dena. Izan ere, garraiolari bakoitza une oro geolokalizatuta dago kontrataren eta Amazonen bidez, eta kontrol deiak jasotzen dituzte, edozein arrazoirengatik (trafikoa, meteorologia, etab.) APPak ezarritako erritmoa betetzen ari ez direnean.
Amazonek azpikontratatutako enpresa sare bat erabiltzen du, lan baldintza prekarioak aplikatzen dituena bere irabazi multimilionarioak handitzeko, garraiolarien bizitzaren kontura.
Bizkaian Amazonen 5 azpikontrata daude:
CITYLOGIN IBERICA S.L.
GRUSAR LOGISTICA Y DISTRIBUCION
BESAIDE LOGISTICS SLU
FLASH DELIVERY SOCIEDAD LIMITADA
E-BOX LAST MILLE, S.L.
Bizkaian 300 banatzaile baino gehiago daude eta 10 lanordu baino gehiagoko lanaldiak betetzen dituzte, jaiegunetan lan egiten dute eta, entrega guztiak betetzen ez badituzte, zigortu egiten dituzte. Enpresa horietan, aldi baterako kontratuak nahi bezala egiten dira; gainera, kontuan izan behar da enpresa horiek guztiek ABLEetako behin-behineko langileak erabiltzen dituztela, eta horrek are prekarioagoa egiten du lan-harremana.
Hau ez da istripu bat, iragarritako heriotza baten kronika da lan baldintza txar batzuei erantzuten dielako, langile hauek arriskuan jartzen dituen prekarietate bati.
Honen aurrean argi daukagu mobilizazioa eta borroka dela bide bakarra. Horregatik, datorren azaroaren 3an goizeko 10etan mobilizazio batera deitzen dugu, Amazoneko instalazioen sarreran, LAB-ESK-STEILAS-ETXALDE-HIRU Sindikatuek deituta.