LAB sindikatua Argentinako hiriburu Buenos Airesen egon da azaroaren 28tik abenduaren 2a bitartean, Argentinako sindikatuekin batera, G20aren goi bilera dela eta gure desadostasuna adierazteko.
G20aren goi bilera azaroaren 30 eta abenduaren 1ean izan zen, eta mundu osoko agintariek hartu zuten parte. Hortarako Macriren gobernuak Buenos Aires hiriburua setiatu eta polizialki hartu zuen, estatu polizial itogarri bat ezarriz. Datu batek argi erakusten du estatu polizial hau zenbaiterainokoa izan den: egun hauetan Buenos Aireseko karriketan zegoen polizia kopurua Malvinetako gerran parte hartu zuten soldadu kopurua baino handiagoa izan da.
G20arekin Macrik bere politika neoliberalaren inposaketa gauzatu nahi izan du, mundu osoko agintariei etxeko lanak ongi egiten dakiela erakutsi nahian. Macri gobernura iritsi zenetik langabezia eta prezioen gorakada eta soldaten jaitsiera etengabekoa izan da. Aldi berean, herrialdea Estatu Batuetako inbertsore kapitalistei saltzen zien bitartean, erreskate baterako FMIari diru-laguntza eskatu zion, eta denok dakigu zer dakarren FMI-ak; liberalizazio ekonomikoa, prekarietatea, prezioen igoera eta gosea.
Horregatik Argentinako herria pairatzen ari den egoera larri honetan, Argentinako ezkerreko eragile politiko, sozial eta sindikalak G20aren goi bileraren aurkako egitarau oso bat prestatu zuten; tartean hainbat, hitzaldi, kontzertu, eta nola ez 60.000 pertsona bildu zituen manifestazio erraldoi bat.
Egoera honetan, LAB sindikatua Buenos Aireseko karriketan Argentinako sindikatuekin egon da, G20 eta FMIaren presentzia errefusatzen eta, aldi berean, Argentinako herriari gure elkartasun guztia adierazten.