Lanuzteak hasi dituzte hiri hondakinen kudeaketaz arduratzen den Bilboko TMB Arraiz enpresan, lantegi horretan denbora luzez pairatzen ari diren egoera larria dela eta. Izan ere, enpresa batzordeak urteak daramatza instalazioak hondatu direla eta makinen mantenua behar bezalakoa ez dela salatzen. Valoriza-Eco enpresak, ordea, neurri eraginkorrik hartu gabe jarraitzen du, eta langileen osasuna eta segurtasuna arriskuan jartzen segitzen du. Gaur izan dute lehen lanuzte eguna, eta langileen %98k egin du bat deialdiarekin. Ondorioz, produkzioa erabat eten behar izan da, eta hondakinak Zabalgarbira bideratu behar izan dituzte.
Egoera hori are gehiago larriagotu du zuzendaritzaren utzikeriak eta Bizkaiko Foru Aldundiaren kontrolik ezak, eta, horren aurrean, erantzun sindikal sendoa beharrezkoa dela uste du enpresa batzordeak. “Ez dugu onartuko gure osasuna arriskuan egotea. Baldintza seguruetan lan egitea oinarrizko eskubidea da”, adierazi du enpresa batzordeak. Lan osasuna eta segurtasuna bermatuko duten neurriak ez ezik, “baldintza duinak bermatu ahal izateko” moduko soldatak ere eskatzen dituzte langileek, bizitzaren kostuaren igoerari erantzungo diotenak.
Aldarrikapenokin lanuzteak egingo dituzte langileek bihar, etzi eta maiatzaren 15ean ere.