LAB sindikatuak deiturik hamarnaka lagun bildu da gaur Izquierda-Ezkerraren egoitzaren aurrean, koalizio horrek Zerrenda Bakarraren aurka duen jarrera salatu eta gaiaren inguruan jarrera aldaketa eskatzeko. Zerrenda Bakarraren aurka agertzeaz gain, I-Ek iragarri duenez prest dago PSNk Nafarroako Parlamentuan aurkeztuko duen lege proposamenaren alde egiteko.
Proposamena aurrera ateraz gero, Zerrenda Bakarra oztopatzeaz aparte, arrazoi linguistikoak medio legez bermatuko litzateke Irakaskuntzan irakasleak zerrendetan banatzeko politika.
I-Eren jarrerak berezko garrantzia du, abenduaren 21ean egingo den osoko bilkuran UPN, PSN eta PPrekin lerratuz gero Aldaketaren indarren aurkako eraso berria izango bailitzateke hori. Bestalde, egun pairatzen dugun anormaltasun administratiboa lege bidez blindatzea eragingo luke. Gogoan izan Estatu osoan ez dagoela hizkuntza profilen arabera langileak banatuko dituen beste erkidegorik eta Nafarroan bertan Irakaskuntza dela segregazioa pairatzen duen alor bakarra. Honi erantsi behar zaio administrazioan gehiengo sindikalak agertutako iritziaren aurka doala.
LAB Nafarroa-Irakaskuntzaren izenean, Nora Salbotxek, bere arduradunak, adierazi duenez, ulertezina da “bere burua ezkertiartzat duen alderdi batek horrelako gaietan 155. artikuluaren aplikazioaren alde daudenekin laukoa osatzea”.
“Deigarria egiten zaigu I-E Zerrenda Bakarraren aplikazioaren aurka horren azkar agertu izana, besteak beste, bere oinarrietan inolako kontsultarik egin gabe. Aldi berean, izugarri harrituko gintuzke koalizio horretako oinarriak irakasleak profil linguistikoaren arabera segregatuak izatearen alde egotea”, adierazi du Salbotxek.
Zerrenda Bakarraren aldeko arrazoiak mila direla eta egungo egoera zentzugabekeria dela gogorarazi du LABeko kideak. “Gure gazteei selektibitatea euskaraz egiten badute soilik euskaraz dauden graduak ikasi ahal izango lituzketela aginduko bagenie, zer pentsatuko genuke? Bada hori da gure irakasleekin egun gertatzen ari dena profil linguistiko aberatsagoak dituztenak bereziki kaltetuz”.
Salbotxen aburuz zinez kezkagarria da egungo egoera legez indartu nahi izatea eta egoera hori egonkortzeak izan ditzakeen ondorioei buruz ohartarazi du. “Tamalgarria da XXI. mendeko Nafarroan elebidunak edota eleanitzak diren irakasleen segregazioa betikotu nahi izatea, lehen eta orain munduan barna jendea bere erlijio, arraza, egoera sozial edo genero arrazoiengatik zokoratua izan den bezalaxe”.
LAB-Irakaskuntzaren arduradunak azaldu duenez, abenduaren 21ean Nafarroako Parlamentuan PSNren proposamena eztabaidatu bitartean, “egoera bideratzeko tartea eta aukerak egon badaude. I-Ek informazioa nahi badu edo Zerrenda Bakarraren atal teknikoak negoziatzeko asmoa badu, egin dezala, baina ez dezala Zerrenda Bakarraren egitasmoa oztopatu, ez behintzat informazio ezaren edo aukera berdintasunaren izenean, justu kontrakoa lortuko duenean”.