Gaur Herriaren hitza aintzat hartu eta bide eman dio Kataluniako Parlamentuak, Independentzia aldarrikapena gauzatuz. Erabaki pozgarria da zalantzarik gabe, ikuspegi ezberdinetatik begiratuta.
Ikuspegi demokratikotik, Espainiako estatu indarren inposaketen aurrean, herritarren erabakitzeko eskubidea lehenetsi delako. Ikuspegi nazionaletik, Kataluniaren aitortza nazionala, Principatean behintzat, aitortu delako. Eta ikuspegi sozialetik ere, behetik gora eraikitako Errepublika bat, langileen aldeko eredu sozial eta ekonomikoa sortzeko aukera historikoa suposatzen duelako. Honenbestez, berri ezin hobea da justizian eta askatasunean oinarritutako bestelako mundu bat sortu nahi dugunontzat.
Euskal Herrian ere jar gaitezen abian, har dezagun etorkizuna geure eskuetan eta sor dezagun mundu hobeago bat geure seme-alabentzat, Euskal Herriko Errepublika sozial eta independentea sortuz. Geuk ere lortuko dugu.
Espainiako estatuak indarraren arrazoiarekin erantzungo dio independentzia adierazpenari; arrazoiaren indarra aldiz Kataluniako Herriak dauka. Eta ez dago bakarrik: Euskal Herritik ere aurre egingo diogu Errepublika berriaren kontrako zernahi erasori.