Denboratxo bat pasatu da uztailaren 7an, Iruran, TSSTko autobus bat tartean zegoen ezbehar larria gertatu zenetik. Garaian salatu genituen komunikabideetan azaldu ziren hainbat gezur bai eta langileon eskaerei entzungor egiten dion aldundiaren jarrera ere. Egun haietan zehar, gertaera ezberdinen artean, aldundiak hainbat konpromiso hartu zituela gogorarazi nahi dugu. Kurtso hasiera berrirako, hainbat neurri hartzeaz gain, hauek iada martxan izango zirela agindu baitziguten. Honen guztiaren aurrean, errepideko garraioko langileei ez zaigu kalera atera eta hau guztia ozen salatzea baizik geratzen, eta testuinguru honetan egin dugu gaurko elkarretaratzea, Donostiako Gipuzkoa plazan, aldundiko jauregiaren aurrean.
Gaur eta ozenki salatu nahi duguna, tamalez eta beste behin ere, Aldundiaren arduragabekeria da. Non geratu dira konpromiso haiek? Zer egin da ordutik hona?
Konpromisoen artean, konkretuki, geldialdi arriskutsuak kentzearen ondorioz, ibilbideak luzatu egingo zirela (poligonoetatik pasatuz), eta honenbestez, ibilbideen denbora tarteak handitu behar zirela aipatu zuten.
Onartezina da langile eta herritarrekin horrela jokatzen duten agintariak izatea.
Honez gain, aldundiak, konpromiso hauek hartu eta bete ez dituen berberak, Buruntzalderako emakida berriaren aurreproiektua aurkeztu zuen irailaren 8an. Gure iritziz onartezinak diren emakidak dira. Murrizketak hainbat zerbitzutan, ibilbideen denbora edo ratioak errealitatea kontutan hartu gabe eginak izatea, hainbat geldialdiren ezabatzea, langileon etorkizuna airean, balizko lanpostuen galera aurreikusten delarik, eta gure eta bidaiarien zerbitzuak eta segurtasuna arriskuan.
Guk, autobus gidariok, egiazki, herritarrei zerbitzu duin eta kalitatezkoa eman nahi diegu, baina hori langileok lan baldintza duinak izatetik igarotzen da. Eta horixe bera aldarrikatzen jarraituko dugu aurrerantzean ere.