Debaldea eskualdeko LAB sindikatuak, hilabetero, euskal preso eta iheslari politikoen etxeratzearen aldeko ekimenen bat antolatzen du. Gaurkoan Eibarko Untzaga Plazan elkarretaratze bat egin du, LABeko delegatu eta Eibarko herritarren parte hartzearekin.
Aipaturiko helburua lortze aldera, jendarte guztiaren inplikazioa beharrezkoa dela uste du LAB-ek. Norabide horretan, langileen eremutik, IREKIren ekimenak, Euskal Herri guztian ia 90.000 sinadura batu eta Gatazkaren Konponbiderako Foro Sozialaren eskuetan utzi izana txalogarria eta positiboa dela deritzo sindikatuak.
LABek preso eta iheslarien etxeratzea lehentasuntzat duela adierazi du. Horregatik, hurrengo kurtsoan, lan eremuan diharduten langile eta eragile guztiak aldarrikapen honekin bat egin dezaten, buru-belarri arituko dela azaldu du.