Hau da Itziargo Nicolas Correa enpresako enpresa batzordeak argitaratutako adierazpena:
EZ GEZURRIK ETA EZ IRUZURRIK
Urtarrilaren 13an NICOLAS CORREAko zuzendaritzak Itziarko lantegia itxi eta produkzioa eta langile guztiak Burgosera eramango zituela, produkzio eta antolakuntza arrazoiak medio, iragarri ondoren urtarrilaren 23an negoziazioen epealdiari hasera eman zitzaion, eta urtarrilaren 14 tik greba mugagabean gaude.
Guk lehenengo egunetik zuzendaritzari esan diogu, iruzurra egiten ari dela eta kaleratze merkeenak bilatzen ari dela planteamendu honekin, arazo ekonomikorik eduki gabe. Argi utzi diegu egin diren bost bileretan guk ez dugula ez Burgosera lekualdatzerik eta ez kaleratzerik negoziatuko.
Nahiz eta enpresak esan digun ordezko plan bat aurkeztu dezakegula, denborarik ez digu ematen horretarako, negoziazio epealdia legeak esaten duen, hamabost eguneko, gutxieneko denborara mugatuz. Enpresa gezurretan ari da, enpresak ez du nahi langileak Burgosera joaterik, eskaintzen dituen baldintzak barregarriak dira. Ahalik eta merkeen langileak kaleratzea bilatzen ari da.
Otsailak 7an enpresak amaitutzat eman du negoziazioen epea, noski ez da akordiorik egon. Orain Gipuzkoako hitzarmenak derrigortzen duelako PRECCOra jo beharra dauka arbitraje bat eskatzera, noski guk ez dugu horrelakorik onartuko.
Egoera aztertu ondoren grebarekin eta mobilizazioekin jarraitzea erabaki dugu eta bi eskaera garbi egin nahi ditugu. Bat instituzioei eskatzen diogu tamaina honetako iruzur baten aurrean beraiei dagokien papera jokatu dezatela bertako industria eta lan postuen defentsan. Eta bigarrengoz zuzendaritzari eskatzen diogu aldebakartasunez pentsatuta daukan plana bertan behera utz dezala eta horrela egiten ez badu epaitegietara joko dugula iruzur hau salatzera.