Lehenik eta behin, Elkarrizketa Sozialaren Kontseilua UPN eta PSNk pasa den legegintzaldiaren amaieran sortutako instituzioa da, elkarrizketa sozialeko eredu jakin bat, 1995etik CEN, UGT eta CCOOek monopolizatu dutenak hain zuzen ere, instituzionalizateko asmoz. Aipatutako eredu horrek ustezko "bake soziala" irudikatzen du, Patronalak lan erreformaren bidez langileriaren kontrako gerra egiten duen bitartean. Erabateko porrota izan da langileontzako, gure lan eta bizi baldintzak 1995ean baino kaxkarragoak baitira gaur egun. Elkarrizketa Soziala, gainera, Erregimen baztertzaile, ustel eta antisozialaren ardatz soziala izan da.
Bigarrenik, 2016ko uztailetik Elkarrizketa Sozialaren Kontseiluak ez du gehiengo sindikal bat ordezkatzen, UGT eta CCOOen ordezkaritza %49,42raino jaitsi baita; hilabetez hilabete murrizten ari da gainera.
Gobernuak bere gonbidapena egin duenean, jakin bazekien LABek ez zuela onartu behar, hortaz fede txarrez egin duela uste dugu. Bere unean Gobernuari esandakoa berresten dugu: Nafarroako Gobernuak eskubidea du Enplegu planaz nahi duen tokian eta nahi duen eragileekin eztabaidatzeko, baina Enplegu Planaren egitura eta edukien inguruko erabakia, nahiz bere azken onarpena, ezin liteke izan Elkarrizketa Sozialeko Kontseiluaren eskumena.
LABek ekarpen ugari egin zizkion Enplegu Planari duela hilabete bat eta Gobernuaren erantzunaren zain dago oraindik.
LAB ez da joango Elkarrizketa Sozialeko Kontseilura eta Enplegu Planaren eztabaida eta onarpena marko horretara mugatzearen kontra egingo du. Berriro ere eskatzen diogu Nafarroako Gobernuari Elkarrizketa Sozialaren Kontseilua disolbatu eta Nafarroan lan harreman eredu berri baten inguruko eztabaida ireki dezan.