2026-11-21
HomeZerbitzu PublikoakEusko JaurlaritzaLABek euskal administrazioan 35 orduko lanasteari eusteko erabaki irmoa har dezan dei...

LABek euskal administrazioan 35 orduko lanasteari eusteko erabaki irmoa har dezan dei egiten dio Eusko Jaurlaritzari

Euskal Administrazioan 35 orduko lanastea berrezartzen zuen dekretua indargabetzen duen TSJ-ren epaiaren aurrean, LABek Espainiar Estatuaren inposizioen aurrean gehiengo sozial eta sindikalaren borondatea defendatu eta errespetatu dezan dei egiten dio Eusko Jaurlaritzari.

2012an lanaldia luzatzea ekarri zuen estatu araua euskal administrazioan ere ezarri zen, eta honen ondorioz milaka lanpostu suntsitu ziren, lan kargak handitu, eta aurrez ere oso kaltetuak ziren zerbitzu publikoen kalitateak are okerrera egin zuen, Osakidetzako itxaron zerrendak gehiago luzatu ziren, ikasgeletan irakaslearen ordezkorik ez egotearen ondorioak larritu, …

Langileok gogor azaldu ginen inposizio berri horren aurrean. LABek 37 ordu eta erdiko lanaldia ezarri ez zedin lanuzte deialdia egin genuen 2012ko uda aurreko hartan, sindikatu denak altxatu ginen negoziazio mahaitik, eta presio horren ondorioz Jaurlaritzak atzera egin zezan eta 35 orduko lanastea berrezartzea lortu genuen.

TSJ-ren epai berri honekin garbi geratzen da enplegu publikoa defendatu nahi badugu, gure zerbitzu publikoak defendatu nahi baditugu eta kalitatezkoak izan daitezela nahi badugu, gure herritargoaren beharrizanak defendatu nahi baditugu, eta herri honetako gehiengo sozial eta sindikalak adierazitako borondatea defendatu nahi badugu ezin garela behin eta berriz espainiar estatuak hartzen dituen erabakien menpe, eta lan harremanetarako euskal esparrua eraikitzea jada premiazko kontua zaigula.

Gaurko Gobernu Kontseiluak hartzen duen erabakiaren zain, oraingoz Gobernuaren hainbat eledunek egindako adierazpenek asko kezkatzen gaituzte, izan ere epaia etsigarria dela esan arren espainiar estatuari aldebiko harremanetarako, eta ekarrizketarako deia berriro ere egitea kaltegarria iruditzen baizaigu. Izan ere espainiar gobernuak behin eta berriz erakutsi baitu esparru laboral zein sozialen hartzen ditugun erabakiak ez errespetatzeko borondatea.

Zentsu honetan gure zerbitzu publikoak sendotzeko eta garatzeko euskal herritarrok dugun beharrizana defendatu dezan, gehiengo sozial eta sindikalak dituen aldarrikapenak eta behin eta berriz adierazia dugu borondatea defendatu ditzan, eta 35 orduko lanastea mantendu dezan dei egiten diogu Eusko Jaularitzari. Inondik ere ez dugu epai hau onartuko, eta lanaldia luzatzeko egon daitekeen edozein saiakeraren aurrean mobilizatuko garela iragartzen dugu.

 

 

 

AZKEN ALBISTEAK | ÚLTIMAS NOTICIAS

Teknikarien sektorean langile borrokaren bidez lortu dugu patronala mugiarazi eta negoziazioa ahalbidetzea

Ikuskizunen eta ekitaldien sektorean 26 eta 27rako aurreikusita zegoen greba bertan behera geratu da gaur; izan ere, behin eta berriro negoziazioak geldiarazten edo oztopatzen ahalegindu den patronala mahaian eser dadin eta teknikarien lan-baldintzei buruz negozia dezan lortu dute langileek beren mobilizazioekin eta presioarekin.

Gipuzkoako helduen egoitzen hitzarmena #LortuDugu

Administrazio publikoko langileekiko ekiparazioaren aldeko urratsak eman eta arrakala murrizten du aurreakordio honek, LABek negoziazio hasieratik mahaian defendatu izan duen bezala.

Lan-ikuskaritzak arrazoia eman digu, eta argi geratu da San Esteban egoitzako langileei eskubideak urratu zaizkiela

Txostenak frogatutzat jo du Getxoko lantokian ez dela errespetatu adinekoen egoitzetako hitzarmena.