Edesa Industrial eta Geyser Gastech-eko langileek ordubeteko lanuztea egin dute zuzendaritzak erabakitako kaleratzeen aurka. 34 langileri eragin die neurriak, eta horietako 8 "kaleratze traumatikoak" dira.
Edesa Industrial eta Geyser Gastech-eko zuzendaritzak atzo arratsaldean eman zien bi enpresa horietako enpresa-batzordeei eta Basauriko langileen ordezkaritzari kaleratzeen berri. 34 langileri eragin die neurriak, eta horietako 8 "kaleratze traumatikoak" dira, langileen batzordeek nabarmendutakoaren arabera. Hala, erabakia salatzeko, ordubeteko lanuztera deitu dute Edesa Industrial eta Geyser Gastech-eko lantokietan; hots, Arrasate, Basauri eta Eskoriatzako lan zentroetan. Jarraipen ia osoa izan du protestak.
Edesa Industrial eta Geyser Gastech-eko langileen batzordeen hitzetan, "gure elkartasuna adierazi nahi diegu kaleratuak izan diren langileei. Berriro eskatzen diegu instituzioei, batez ere, Eusko Jaurlaritzari, beharrezkoa den heinean inplikatu daitezen prozesu honetan".