Mercedes Gasteizeko aurreakordioak prekarietatea gehiago dakar langileentzat, enpresaren irabaziak handitzeko

LABek oso negatiboki baloratzen du Mercedes Benzeko zuzendaritzak eta gutxiengoa diren UGT, PYM eta Ekintza sindikatuek erdietsitako aurreakordioa. Langileen bizkar negoziatua izan den, eta hortaz antidemokratikoa izan den aurreakordio honek Zuzendaritzaren aldarrikapen nagusiak jasotzen ditu, prekarietatea areagotuz.

– 5 urteko iraupen oso luzea, enpresak nahi zuen moduan bake soziala bermatzeko.
– Soldata igoera txikiak (%1,8), KPIarekin inolako loturarik gabe. Gogoratu behar dugu 2015an 77 miloi euroko irabaziak izan zituela Mercedes Benz España enpresak, inoizko hoberenak.
– Kontratazio berrientzat soldata eskala bikoitza bikoizten du: diskriminazio egoera hau urtebetetik bi urteraino luzatuz.
– Malgutasuna areagotzen da langileentzat.
– Lan erreformaren kontrako klausularik ez da jasotzen, hitzarmenaren aplikazioa bermatzeko.

Horren truke, enpresak soilik bermatzen du 500 lanpostu finko sortuko dituela eta, beste hainbeste ekoizpenaren arabera. Gogoratu behar dugu horietako 300 aurreko hitzarmenean adostu zituztela. Gainontzekoen kasuan, legeak berak behartzen du Mercedes horretara, iruzurrean aldi baterako kontratatutakoak baitziren, 8 urte baino gehiago baitaramatzate lanean. Beraz, finkoak izan beharko luketen beste hainbeste langilek (ia 1.000) aldi baterako kontratuarekin jarraituko luke.

Hortaz, enpresaren neurrira egindako aurreakordioa da sinatu dutena, Mercedesek emaitzarik onenak izan dituen urte honetan, bai maila lokalean zein mundu mailan. Fakturazioa %25 igo da, eta irabaziak %30 igo dira. Zuzendaritzari soilik on egiten dion aurreakordioa, alegia.