LABetik enpleguari eustea defendatu dugu orain arte, horrelako gertakariak errepikatzea ekidingo duten segurtasun neurriak jartzea eta aldeen arteko eztabaida eta negoziazioa ahalbidetuko duen prozedura bat erabiltzea, egoera horri aurre egiteko alternatibak daudelako; eta horretan ari gara gaur egun ere. Era berean, ezinbestekoa izatea ukatzen dugu, enpresan etengabeak izan direlako sute eta antzerako gertakariak (azkena urtarrilean, suhiltzaileek ere parte hartu zutelarik), nabarmena izanik lantegian dagoen segurtasun neurri falta.
Nabarmendu nahi dugu Asparrenako Udalak, ezohiko Osoko Bilkuran, bere elkartasuna adierazi ziela kaleratutako langileei eta kezka erakutsi zuela herrian, biztanle zein inguruneari arazoak sortzen dizkien enpresa bat kokatuta dagoela.
Bizi zen egoeraren aurrean protesta egiteko, langileek greba hasi zuten joan den maiatzaren 10ean euren lanpostuak eta jarduerak jarraitzea defendatzeko.
Testuinguru honetan, LABek modu positiboan baloratzen da Lan Agintaritzak joan den maiatzaren 11an honakoa ebaztea: “ezin da sutetik eratorritako ezinbestekotasunik egiaztatu, Sertego enpresako 13 langileren kontratuen desegiteen arrazoi modura”, prozesu osoan zehar defendatzen egon garen moduan.
Hala ere, ebazpen honi erantzunez, Urbaser taldekoa den Enpresaren Zuzendaritzak, mugarik gabeko prepotentzia eta autoritarismo keinu batean, 7 norbanako kaleratze burutu zituen arrazoi produktibo eta antolaketaren ingurukoak aipatuz, horrela kaleratze kolektiboa ekidinez. Azken honek, kontsulten aldia hastera behartuko luke, langileekin akordiotara iristeko.
LABek tinkotasun osoz baztertzen ditu modu iruzurtian egindako kaleratze hauek eta horrela aldarrikatuko du esparru guztietan. Argi dago enpresak sute bat baliatu nahi duena, bere utzikeriaren ondorio izan zela, hainbat langile kaleratzeko. Borroka eta langileen eskubideen defentsarekiko konpromisoa berresten dugu, enpleguak manten daitezen eta osasunarentzat eta inguruarentzat seguruak izango diren baldintzetan lan egin ahal dezaten.