Gertaera honen aurrean Abasolok bere egunean egin zituen adierazpenen inguruan egin genuen balorazioan sakondu nahi genuke. Orduan esan genuen bezala, enpresaren zuzendaritzak langileei murrizektak ezartzeko asmoa ez da berria. Iazko azaroan salatu genuen enpresak egin zuen proposamena, soldata murriztu, lanaldia luzatu eta malgutasuna ezartzeko. Guztia balizko aldi baterako EEEa aurkezteko erabiltzen zituzten argudio berdinekin, petrolioaren prezioen jaitsiera, esplotazio berria irekitzeko planak izoztea, etab. Aipatu proposamenak enpresa-batzordeak ahobatez baztertu zituen.
Aipatu adierazpenetan, zuzendaritzak argudiatu eta komunikabideek nabarmentzen zituzten 2015ean egindako galerak eta etorkizunean aurreikus zitezkeenak, baina ematen du denek ahaztu dituztela aurreko urteetako emaitzak eta irabazien banaketak. Orain, enpresak gure soldatak eta herritar guztion baliabide publikoak erabili nahi ditu bere emaitzak mantentzeko, honela irabaziak pribatizatu eta galerak sozializatuz.
Era berean, dei egin nahi diogu Tubos Reunidoseko zuzendaritzari, gure eskubideak urratzearekin mehatxatu beharrean, enpresan dagoen antolakuntza aldetiko kaosari konponbidea eman diezaion. Horrela ditugun arazoetariko asko estaliko lituzke, indarrean dagoen inprobisazioa, antolaketa falta eta aurreikusten faltak sortutakoak. Horren isla dira urtarrilean, 12 egunetako epean, gertatu ziren istripu larriak.
Amaitzeko, ez dugu ahaztu nahi Eusko Jaurlaritzak ematen dituen sarietako batzuk jasotzen dituztenek, gero honen antzeko “opariak” egiten dizkigutela. Abasolok “Joxe Mari Korta” sarietako bat jaso zuen bere ibilbide profesionalagatik duela ez azko. Zalantzan jartzen dugu langileoi eta jendarteari orohar bere irabaziak mantentzeagatik ordainaraztea saritzeko modukoa zerbait denik.