Garbiñe Aranburu idazkari nagusiak eta LABeko Nazioarteko idazkari Koldo Saenz-ek bilera izan dute Europako Ezkerraren Alderdiko (European Left Party) zenbait ordezkarirekin, egungo egoera sozial, politiko eta ekonomikoaren inguruko gogoeta partekatzeko eta harremanak sakontzeko. Alderdi horretako presidente Heinz Bierbaum izan da gurean, Waltraud Fritz eta Liliana Pinto kideekin batera.
Europako egungo testuinguruaren kokapena egin dugu ikuspegi subiranista batetik, Europako Funtsen eta pandemiaren kudeaketari buruz hitz egin dugu, ultra-eskuindarren gorakada izan dugu hizpide eta Ukrainako gerrak ekarritakoa eta ekar dezakeenari buruz ere aritu gara, besteak beste. Bizitza eta pertsona nahiz herri guztien eskubideak esparru guztietan erdigunean jarriko dituzten politikak borrokatzea ezinbestekoa dela adierazi dugu, eta, era berean, ezkerretik alternatiba soziala nola osatu izan dugu hizketagai.