Ohar honen bidez LABek EITBn duen ordezkari bat anonimo baten aldetik pairatzen ari den mehatxuak salatu nahi ditu. Astebete baino gutxiagoan barruan kaka zuten pakete bana birritan bidali dira ordezkari honen izenean, lehen aldian EITBk Bilbon duen egoitzako LABen bulegoaren aurrean utziz, eta bigarrenean ordezkari bearen izenean ere bidalia, kasu honetan gezurrezko bidaltzaile bezala EHBILDUko parlamentari baten izena erabiliz.
LABen aldetik gardenak eta guztion parte hartzea behar duten kalitateko zerbitzu publikoen alde egiten dugun borroka sindikalaren kontrako halako mehatxurik ez dugula onartuko adierazi nahi dugu. Urteak daramatzagu komunikabide publiko honetan urteetan eman izan den kudeaketa eredu ilunzale eta opakoa salatzen. Baita kontratazioaren eremuan ere, non urteetan “atzamarrez” egindako kontratazioa lehenetsi izan den, LPDk eta hauen ondorioz sortzen ziren lan poltsek ematen zuten gardentasuna saihesten zela, Eusko Irratia kasu. Irizpide garbiak ezartzen ez diren kontratazio eredu hau hain zuzen administrazio publikoan ematen diren hainbat ustelkeria eta bezerokeria moten oinarria da. Eredu hauxe da kontrol eta parte hartze publikoa baztertzen duena, eta jendartean mesfidantza sortu eta kalitateko zerbitzu publikoaren eredu bat higatu egiten du.
Baina ikusten ari garen bezala badirudi hainbatek eredu ilunzale honetaz baliatzen jakin izan dutela eta enpresa publiko batean lanean sartzeko aukera berdintasunaren alde ez daudela, eta bakoitzaren merituak era objektiboan frogatuko dituen LPD bat egitearen aldekoak ere ez direla. Batzuk EITB euren txiringitoa dela uste dute eta halaxe dena berean gelditzearren honelako ekintza sasi-mafiosoak erabili ditzaketeela. Eredu ustel horrixe dario kiratsa eta denbora luzez usaindu du gaizki, batzuk hain gustura sentitu diren eta orain eroriko den eredua.
Hauxe zen LABek sinatutako akordioaren helburu nagusietako bat, behin-behinekotasuna hain handia den garai batean era finkoan 49 lanpostu bermatzeaz gain. LABetik aldetik kalitateko zerbitzu publikoak sortzeko temati jarraituko dugu, non eta sarbiderako aukera berdintasuna lehenetsiko den, jendartearen zerbitzura eta honen kontrolpean, baita EITBn eta Eusko Irratian ere. Zentzu honetan datozen egunotan azken gertakizunak epaitegian salatuko ditugu.