Azken hilabeteotan, LABek eskola-sisteman ematen diren segregazio anitzen inguruko gogoeta-prozesu bat bultzatu du, eta horren ondorioz lan-txosten bat osatu du, eztabaidarako oinarri gisa zabalduko duguna. Jatorria, hizkuntza, kultura, erlijioa, aniztasun funtzionala, generoa edo klasearen arabera ikasleak segregatzea arrazista eta klasista dela deritzogu. Gure ustez, hezkuntzak ezin ditzake berak bakarrik segregazioak gainditu, baina hezkuntzatik badago zer egin.
Txostenaz gainera, eta hausnarketan laguntzeko asmoz, Segregaziotik Inklusiora izenburuko Jardunaldi irekiak egingo ditugu martxoaren 27an, Gasteizko Europa Jauregian. Bertan, Hernaniko Hezkuntza Plataforma, Aranbizkarra Ikas komunitatea edota AMUGE emakume ijito feministen ordezkariek segregazioa gainditzeko egiten ari diren lana azalduko dute.
Beste alde batetik, EHUko Onintza Odriozola eta HUHEZIko Eneritz Garro irakasleek “Segregazioa gaindituz herri, hizkuntza eta kultura zapaldutik” izenburuko mahai-inguruan parte hartuko dute. Ondoren, Intersindical-CSC sindikatuko Antoni Casserres –ek Catalunyan dagoen harrera-protokoloaz hitz egingo digu, eta Diana Urrea politikari eta aktibista feminista eta antiarrazistak, Colombiatik Euskal Herriratu zeneko esperientziatik mintzatuko da.
Horretaz gainera, esan bezala, LABetik osatu dugun txostena publikoa egingo dugu.