2012ko martxoaren 29ko greba orokorrean gertatutako istilu batzuetan parte hartu izana leporatuta epaitutako hiru gazteri ezarritako zigorra salatzeko elkarretaratzea izan da gaur Bilboko Auzitegien aurrean Grebalariak Aske!k deituta. Parte hartzaileek, beste behin, salatu dute gazte hauek turko-buru gisa erabili dituztela beste eredu sozioekonomiko baten alde borrokatzeagatik eta protesta soziala isilarazteko eta kriminalizatzeko.
Irailaren 11n Bilboko hiru grebalariak (Aitor Fernández, Jon Telletxea eta Urtzi Martínez) epaitu zituzten, 2012ko martxoaren 29ko greba orokorrean gertatutako istilu batzuetan parte hartu izana leporatuta. Eskaera fiskala: 14 urteko espetxe zigorra bakoitzarentzat. Epaia: absoluzioa Aitorrentzat eta 15 hilabeteko espetxe zigorra Urtzi eta Jonentzat desordena publikoengatik.
Epaiak oinarririk gabe uzten du hasieratik salatu dugun muntaia poliziala. Hala ere, fiskaltzak eta akusazio partikularrak helegitea jarri dute. Fiskaltzak, mozorroaren astungarria argudiatuz, bi urte eta erdiko espetxe zigorra eskatu du Urtzi eta Jonentzat. Akusazio partikularrak osotasunean errekurritu du epaia (hau da, 14 urteko espetxe zigorra eskatu du hiru auzipetuentzat). Horrez gain, abenduaren 12an Irantzu Yaldabere epaitu dute Bilboko adingabeen epaitegian.
Beraz, gura borroka oraindik ez da bukatu. Berriz ere salatu nahi dugu gazte hauek turko-buru gisa erabili dituztela beste eredu sozioekonomiko baten alde borrokatzeagatik eta protesta soziala isilarazteko eta kriminalizatzeko. Guk lanean jarraituko dgu Aitor, Irantzu, Jon eta Urtziren behi betiko eta erabateko absoluzioa lortu arte, eta antolatuko ditugun ekimenetan parte hartzeko deia egiten diegu bidegabekeria hau salatu nahi duten pertsona eta eragile guztiei.
Aitor, Irantzu, Jon eta Urtzi aske! Absoluzioa!
{module[111]}