EAEko Haurreskolak Partzuergoan ordezkaritza dugun LAB, STEILAS eta ELA sindikatuok agerraldia egin dugu Bilbon, jaiotzatik hezkuntza eskubidea bermatu dadin, haurreskolek doakoak eta hezkuntza sailean integratuak behar dutela egon aldarrikatzeko. Mobilizazioak iragarri ditugu datozen egunetarako.
Hauxe da sindikatuon irakurketa:
Haurreskolak Partzuergoan ordezkaritza sindikala dugun sindikatuok, LAB, STEILAS eta ELAk, ikasturte korapilatsu hau hasi eta ia hilabete bira Partzuergoko gerentziarekin eta Eusko Jaurlaritzako ordezkariekin inolako harremanik izan ez dugunez, eta langileen eta hezkuntza-proiektuaren egoera gogorra aintzat hartuta, mobilizazioei hasiera ematera behartuta aurkitzen gara.
Izan ere, hezkuntza-arloko beste sektore batzuetan (hezkuntza berezian, zerbitzuetako langile eta irakasleen) mahai negoziatzaileak deituak izaten ari diren bitartean, Haurreskolak Partzuergoko aurrez aurreko negoziazio-mahaia oraindik ez da deitua izan, nahiz eta ikasturte honetan behin baino gehiagotan eskatu izan dugun.
Era berean, Hezkuntza Sailburu eta Haurreskolak Partzuergoko Zuzendaritza Batzordeko Lehendakaria den Jokin Bildarratzek ez du deitu zuzendaritza batzordeko bilera eta ez du oraindik Haurreskolak Partzuergoko Mahai negoziatzaileetara etorriko den ordezkaria izendatu. Batzorde honen deialdiaren garrantzia azpimarratu behar dugu, batzorde horretan hartu behar baitira Haurreskolak Partzuergoko langileei eta hezkuntza-proiektuaren bilakaerari eragiten dieten erabakiak. Hezkuntza Saileko talde berriak Haurreskolak Partzuergoarekiko duen arduragabekeria erakutsiz.
Bestalde, Zorione Etxezarraga gerente berriak, kargua hartu zuenetik, sindikatuekiko inkomunikazioa eta jarrera autoritarioak gailendu dira orohar. Egoera larriagoa da oraIndik pandemia egoeran gaudenetik, gerentziak gure lan eta lanbide-etorkizunari zuzenean eragiten dioten erabakiak hartzerakoan langileen ordezkariak kontuan hartu ez dituelako.
Bestalde, haurreskolen egungo egoerari dagokionez, gerenteak hartutako aldebarreko erabakien ondorioz Haurreskolak Partzuergoaren hezkuntza-proiektua arriskuan jartzen ari dela salatu nahi dugu. Hori dela eta, neurri horiek geldiaraztea izango da gure helburu nagusia.
-Negoziazio kolektiboa ukatu egiten zaigu, dagoen hitzarmen eta araudi guztiak urratuz eta langileen ordezkaritza gutxietsiz.
– Ordezko langileen kontratazio berria geldiarazi egin da; horrela, beste langile batzuen baja medikoak, baimenak edo lizentziak betetzeko, kontratupean dauden hezitzaileak haurreskola batetik bestera eguneroko desplazamenduetara jotzen da, zentroen hezkuntza proiektua, irizpide pedagogikoak eta haurren egokitzapenak hankaz gora jarriz
-Horrez gain, aparteko orduak egitera behartzen dituzte langileak, ordezkoak bidaliko ez dituzten mehatxupean. Gure hitzarmenean aparteko egoeretarako bakarrik aurreikusita badira ere, gaur egun aurreikusi daitezken egoera arruntei aplikatzen zaizkie.
–Beharrezkoa den kontratazioa blokeatzeko erabakia hartu du, Haureskolak Partzuergoa enpresa pribatua balitz bezala. Horrekin, ehunka ordezko lanik gabe utzi ditu, partzuergoak eskaintzen duen hezkuntza-proiekturako urte askotan zutabe garrantzitsua izan direnak, gaur egun erakunde publikoetatik abandonu egoeran daudelarik.
Beraz, salatu behar dugu hezkuntza eta gizarte zerbitzua eskaintzen duen enpresa publiko bat izanda, Haurreskolak Partzuergoko Gerentea den Zorione Etxezarragak, pandemia egoerari aurre egiteko kontingentzia planerako gehigarririk izan ez duen aurrekontutik ez pasatzeko erabakia hartu duela eta egoera hau erabiltzen ari dela lanpostuak suntsitzeko eta langileon lan baldintzak okertzeko.
Gauzak horrela, negoziazioa berreskuratzeko, kontratazioa desblokeatzeko eta langileen lan baldintzak hobera egiteko, mobilizazio dinamika hau jarriko dugu abian:
-Datorren asteazkenean, hilak 28, goizeko 11:30etan konzentrazioa Eibarren Haurreskolak Partzuergoak duen egoitzaren atarian.
-Hurrengo astean, era deszentralizatuan EAEko 3 hiriburuetako Hezkuntzako Delegaritzetan. Egunak eta ordutegiak zehazteke daude.
Haurreskolak Partzuergoaren etorkizuna kolokan jartzen ari da Eusko Jaurlaritza, egoera honi buelta emateko eta jaiotzatik hezkuntza eskubidea bermatu dadin Haurreskolak doakoa eta hezkuntza sailean integratua nahi dugu.