2026-11-17
HomeIndustriaMetalgintzaELAk arriskuan jarri du Gipuzkoako metalgintzako hitzarmenaren negoziazioa

ELAk arriskuan jarri du Gipuzkoako metalgintzako hitzarmenaren negoziazioa

LABek komunikabideen bidez jakin du ELA sindikatuak ADEGIren Gipuzkoa metalaren hitzarmenaren negoziazioan egindako azken proposamena sinatzeko prest dagoela. ELAk urrats hau negoziaketa mahaiko bileraren bezperan eman du. Gainera, alde bakarrez emaniko urratsa izan da, gainontzeko sindikatuekin kontatu gabe eta gehiengoaren akordioa bilatu gabe. Bilera baino 24 ordu lehenago uko egin diote mahai gainean dagoen proposamena hobetzeari. Zer interes du ELAk negoziaketa gelditzeko?

LABek ez du bat egiten ELAk erakutsitako presa eta erabakiarekin. LABen iritziz negoziaketa irekita dago. Uztailaren 7an negoziaketa ireki zenetik 6 bilera besterik ez dira egin. Azken bileran aurkeztu du Adegik lehen aldiz proposamen idatzi bat, guztiz zehaztasunik gabea, gainera.

Edonork ulertuko lukeenez, 9 urtez berritu ez den hitzarmena berritzea oso konplexua da, eta hainbat lege aldaketa eta epaien arabera egokitu beharra dago testua. Oraindik ez da horrelakorik egin.

Gainera, enpresarien proposamenak alderdi oso positiboak dituen arren, esaterako, langile batzuen subrogazio eskubidea, soldaten eguneraketa %8,8koa, hitzarmenari berme juridikoak emateko klausula, proposamenak gabezia garrantzitsuak ere baditu:

– Soldata igoerak hobetu daitezke hitzarmenak zehazten duen gutxiengoa aplikatzen zaien langileentzat.

– Ez dago berdintasuna bultzatzeko inolako neurririk. Hitzarmenean batzorde bat izendatua dagoen arren, gizon eta emakumeen arteko berdintasuna sustatzeko, LABek edukiz betetzea eta akordioa egin bezain laister martxan jartzea eskatu du. Adegik ez du onartu gaur gaurkoz. Onartezina da. Adegiren traineran ez da emakumerik, antza.

– Lan Osasunaren aipamenik ere ez dago.

– Baimenei dagokionean, Auzitegi Gorenak epaietan ezarritako ez da onartzen, baimenak lehen lan egunetik has daitezen.

– ABLEei dagokienez, proposatutako testuan ez dago bermerik euren erabilera benetan mugatuko denik.

Argi dugu sektoreko langileak egiten ari diren borrokak eta LABek egin dituen mobilizazioek fruituak ematen ari dela negoziaketa mahaian. Bihar LAB negoziaketa mahaira joango da sektore hitzarmen on bat lortzeko. ELAk gaurko albistearekin hitzarmenaren negoziaketa arriskuan ez jartzea espero dugu.
Hitzarmen duina lortuko dugu metalgintzan.

AZKEN ALBISTEAK | ÚLTIMAS NOTICIAS

Bertako LGS behar dugu, Euskal Herriko langileen errealitateari erantzuteko

Espainiako Gobernuak gaur onartu du Lanbide arteko Gutxieneko Soldataren (LGS) igoera, baita langile publikoen soldaten %4,5eko igoera ere. LABen ustez, erabaki horiek langile batzuen egoera ekonomikoa hobetuko badute ere, Hego Euskal Herrian eragin mugatua izango dute, eta ez diete gure langileen beharrei erantzungo. Gainera, langile publikoen soldaten igoera Madrildik inposatua eta ez-nahikoa da.

Beste mobilizazio egun bat Osakidetzan

Mahai Sektorialean aurrerapauso nahikorik ez dagoenez, LAB, SATSE, ELA, CCOO eta UGT sindikatuok elkarretaratzeak deitu ditugu gaur lan zentro guztietan: 11:00etan ospitaleetan eta 13:00etan Lehen Mailako Arretan.

Ikuskizun eta ekitaldien sektoreak beste bi greba egun iragarri ditu Hego Euskal Herrian, azaroaren 26an eta 27an

LABek, ikuskizun eta ekitaldien sektorean Nafarroan ordezkaritzaren %100 duen sindikatuak, EAEko beste sindikatuekin batera (Teknikariok, ESK, ELA CCOO, UGT eta CNT) bi greba egun berri deitu ditu negoziazioak desblokeatzea eta sektoreko lehen hitzarmen kolektiboa sinatzea eskatzeko. Deialdi bateratuak bi lurraldeetan partekatzen den aldarrikapen bati erantzuten dio: prekarizatutako sektore baten erregulaziorantz aurrera egitea.