2024-09-19
HomeEkintza SozialaPolitika soziala“Etsigarritzat” jo dugu Iñigo Urkullu lehendakariaren agerraldia

“Etsigarritzat” jo dugu Iñigo Urkullu lehendakariaren agerraldia

LABeko idazkari nagusi Garbiñe Aranburuk “etsigarritzat” jo du Iñigo Urkullu lehendakariak Politika Orokorreko plenoan egindako irekiera agerraldia, Gasteizko Legebiltzarrean. Kataluniako egoeraren aipamena egiten hasi du bere hitzartzea lehendakariak, baina esandakoak “ez gaitu batere ase”, Katalunian bizi den egoera oso larria baita, “eta bestelako erantzun bat behar du bere aldetik; argi eta ozen esatea PPren Gobernuarekin apurtzen duela, hain zuzen ere”, adierazi du Aranburuk.

Katalunian atzo beste urrats bat eman zuen Espainiako Gobernuak bere bide errepresiboan. Sindikatuko idazkari nagusiaren hitzetan, “Estatuak erakutsi du ezinezkoa dela berarekin bide adostu bat egitea, Estatuak erakutsi du ezinezkoa dela erabakitzeko eskubidea adostasunaren bidetik eraikitzea, eta PPren Gobernu hori sostengatzen egotea, erabat antidemokratikoa eta erabat korruptoa denean, zentzugabekeria handi bat da”.

Errealitatetik oso urrun
Bestalde, LABetik ere baloratu dugu lehendakariak egindako agerraldi orokorra. Zentzu honetan, sindikatuarentzat Urkulluren diskurtsoa hutsa, konformista eta euskal gizarteak bizi duen errealitatetik gero eta urrutiago dago. Estatutua ez da bete, baina, are eta gehiago, Konstituzioaren eta oinarrizko legeen erreformekin eskumenak txikitu dituzte arlo guztietan, aldebakartasunetik gainera, EAJren bazkide PSE edo PPren eskutik.

Zintzilik dauden eskumenei buruzko 1993ko Zubia txostena 2017an berreskuratzeak garbi uzten du aldebikotasunaren estrategiaren porrota, estrategia horrek behin eta berriz talka egiten baitu Espainiako totalitarismoarekin. Gertatzen ari denarekin, lotsagarria iruditzen zaigu lehendakariak elkarrizketa eta negoziazioa eskatzea arazo politikoak konpontzeko, Estatua autodeterminazio eskubidea erasotzen ari denean.

Lehendakariak, gaur, Estatu konfederal baten proposamena mahai gaineratu du, baina proposamen hori kezko hesi bat besterik ez da, Euskal Herriak erabakitzeko duen eskubideari buruzko konpromiso argirik ez hartzeko. Euskal gizarteak bere etorkizuna erabakitzeko aukera era mugagabean atzeratzen du, euskal gizarteak bere oinarrizko eskubide sozial, politiko eta ekonomikoak bermatuko lituzkeen erakundeei buruz erabakitzeko aukera, alegia. Lehendakaria bere inguruan dabil bueltaka, norabide bat duenaren itsura emateko. Lehendakariak berak daki berak babestutako euskal bideak ez duela inora eramaten.

Gai ekonomikoen inguruan egindako proposamenei buruz, gauza bera: ezintasun eta borondate
politiko falta handia du bere gobernuak, fiskalitate eta aurrekontu arloetan gurearen antzeko per capita errenta duten herrialdeetako BPG mailara iristeko, eta, hori dela eta, Espainiara begira jartzen da hobeto gaudela harro esateko; I+D+I esparruko hiru plan egin dituzte, berrikuntza arloan BPGren %3aren inbertsioa proposatuz, eta ez dute bete. Gero eta urrutiago gaude punta puntan dauden Alemania, Frantzia eta Txinatik. Sortzen den enplegua prekarietatean oinarrituta dago oraindik orain; gure ekoizpen sareak inbertsio fondo eta espekulatzaileei saltzen die bere burua, eta enpresen itxierak eguneroko ogi bilakatu dira; bazterketak eta prekarietateak aurrera jarraitzen dute, eta gero eta jende gehiagok, lana izan edo ez, ez du bizitza duin bat egiteko baldintzarik.
Lehendakariak elkarrizketa eta negoziazioa aldarrikatzen ditu negoziazio kolektiboa izoztuta duenean bere langileekin eurekin, eta euskal gehiengo sindikala baztertzen du elkarrizketa eta negoziazio esparrutik, bere gobernuaren enplegu, gizarte eta ekonomia politikei dagokienez.

Lehendakariak esandakoaren arabera, euskal preso politikoen kolektiboaren urgentziazko aldarrikapenek ere ez dute instituzioen babesik izango.

Azken finean, ohiko diskurtsoa egin du, herri honen errealitatetik urrun, eta azaletik begiratu dio Katalunia pairatzen ari den eraso totalitarioari.
 

 

 

AZKEN ALBISTEAK | ÚLTIMAS NOTICIAS

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.

Fekoorren mobilizazio zikloa abiatuko dugu datorren astean

Desgaitasun fisikoa edo/eta organikoa duten pertsonen Bizkaiko Federazio Koordinatzaileko beharginek hitzarmen propioa dute aldarri.
01:41:36

[BIDEOA]: “Zerga-sistema aldatu, aberatsek gehiago ordain dezaten” solasaldia Iruñean, Mikel Aranburu eta Carlos Cruzadorekin

Fiskalitatearen inguruan antolatu dugun lehen solasaldietako lehena izaten ari da orain, Iruñeko Txalaparta liburudendan. Ilargi Jaunarena sindikatuko ekonomialariak gidatuta, Carlos Cruzado “Los ricos no pagan IRPF. Claves para afrontar el debate fiscal” (Capìtan Swing, 2024) liburuaren egilea eta Mikel Aranburu Nafarroako Gobernuko Ogasun kontseilari ohia zerga-politikaz ari dira solasten.