LABek manifestazio bat egin du gaur Bilbon “Prekarietatearekin industria 4.0rik ez dago. Aberastasuna banatu” leloarekin. Mobilizazioa Eusko Jaurlaritzaren egoitzan hasi eta Confebasken egoitzaren amaitu da. Industriaren etorkizuna kolokan dagoela adierazi dugu, eta arduradun politikoek eta patronaleko buruek propaganda baino ez dutela egiten salatu.
Gaurko mobilizazioan esan nahi dugu argi eta garbi, gure industriaren etorkizuna kolokan dagoela, eta gure agintari eta patronaleko buruek propaganda besterik ez dutela egiten. Nahi dituzten kongresu guztiak egin ditzakete, baina ez dute aldatuko errealitate hau: Prekarietatearekin industria 4.0.rik ez dago!
Hitzez beste eredu baten alde eginagatik, Espainiako ereduaren aldeko apustua egin ari dira praktikan: lan kosteak murrizten dira balio erantsia dituen produktuen aldeko inbertsioa bultzatu beharrean. Industriak, teknologikoki aurreratua izateaz gain, aurreratuak izan behar du gizartearen ikuspegitik, baina baita lan baldintzen ikuspegitik ere. Tamalez, bai Confebask bai Eusko Jaurlaritzaren apustua guztiz kontrakoa da, prekarietatea hedatzearen aldeko apustua. Industria 4.0. bultzatzen ari dela diozuen bitartean, egiten ari zaretena PREKARIETATEA 4 INDUSTRIA POLITIKA 0 eredua da:
1. LAN ERREFORMA APLIKATZEN DUZUE
Kaleratze merkea, azpikontratazioa, behin behinekotasuna, ABLEak, zergak ordaintzen ez dituzten enpresak, espekulazioa eta pelotazoan oinarritutako industria sustatzen dute. Pertsonen gaitasunean lehiatu beharrean, pertsonak murriztu beharrezko gastutzat hartzen dituzue. Espainiako ereduarekin ez dago berrikuntzarik, ez dago balio erantsirik, ez dago etorkizuneko industriarik.
2. NEGOZIAZIO KOLEKTIBORAKO ESKUBIDEAREKIN AMAITU NAHI DUZUE
Langileek baldintza okerragoetan zeinek lana egin lehiatzea nahi dute. Hazkunde ekonomiko garaian gauden honetan, nola baimendu liteke sortzen den aberastasuna ez banatzea langileei, patronalak hitzarmen kolektiboak negoziatzeari uko eginez? Inoiz baino aberastasun gehiago sortzen ari den honetan lapurreta erraldoi bat egiten ari dira, denon aurrean.
3. KONTRATAZIO BERRIAK DISKRIMINATZEN DITUZUE
Kontratazio berriei baldintza okerragoak ezartzen dizkiezue, lan merkatua prekarioagoa ezarriz. Emakumeek jasaten duten diskriminazioa betikotzen ari zarete. Gazteentzat hiru alternatiba aurkezten dituzue: kanpora joatea erbesteratze ekonomikora, langabezia edo prekarietatea.
4. POBREZI HANDITZEN DUZUE
Pobrezia eta desberdintasuna handitzen ari zarete. Enplegua jadanik ez da pobreziatik ihes egiteko bermea, ezta industrian ere. Prekarietatea, gelditzeko etorri da industriara.
Horregatik, gure industriaren defentsan, propaganda gutxiago eta benetako industria politika bat egitea eskatzen dizuegu. Eta horretarako, ezinbesteko urratsa, burujabetzaren aldeko urrats eraginkorrak ematea da. Espainiako eredua ezartzen jarraitzen badugu, gure industria etorkizunik gabeko industria izango da, langileen bizi baldintzen kontura arrakasta gabe lehiatu nahiko duen industria.