2024-09-20
HomeHerriak du hitza eta erabakiaLAB: «Eskoziako patio politikoa astindu dute independentistek, erabakitzeko eskubidea agendaren erdian kokatuz...

LAB: «Eskoziako patio politikoa astindu dute independentistek, erabakitzeko eskubidea agendaren erdian kokatuz eta Europan bidea irekiz»

Garai berri bati ateak irekitzeko aukerak inoiz baino argiagoak ikusten ditu LABek; inoiz baino baldintza hobeak daude erabakitzeko eskubidearen auzia Euskal Herriak irabazteko, konpromiso politikotik eta mobilizazio sozialetik.

Eskoziako erreferendumaren emaitza ezagutu berritan, LAB sindikatuak honakoa adierazi nahi du galdeketa prozesu honen gainean:

• Independentziaren aldeko eta kontrakoen arteko lehia politikoa izan da benetako garaile, bi aldeak garaile egin dituen ariketa demokratikoa izan da Eskoziako erreferendum prozesua. Ezezkoa nagusitu da, baina benetako galtzaileak proiektu politikoak herriaren gainetik inposatu behar direla pentsatzen dutenak izan dira, horiek besterik ez.

• Eskoziarrek gaur atzo baino estatus politiko hobea dute. Independentismoaren lorpena izan da. Eskoziako patio politikoa astindu dute independentistek, erabakitzeko eskubidea agendaren erdian kokatuz eta Europan bidea irekiz.

• Erabakitzeko eskubideak bere bidea hasi du Europan, Eskozian egin den prozesua mugarria izan da eta izango da Europako maparen bilakaeran. Ikusi dugu mapa ez dela mugiezina eta, are gehiago, gatazka politiko ugariren iturri dela mugitzeari beldur dioten estatuek mugiezin bihurtu nahia herriaren borondatearen gainetik. Herriari hitza ematea da gatazkak konpontzeko biderik egokiena eta demokrazia ariketa gorena. Oso kezkagarria da Europako hainbat estatuk zelako beldurrarekin begiratu dioten prozesu honi. Herriaren hitzari hainbeste beldur dionak ez ditu bere erabaki politikoak herritarrengan pentsatuz hartzen.

• Independentistak garen heinean, Eskoziari arretaz begiratu diogu, independentziaren bidea egiteko eredugarria delako bai, baina baita independentziaren inguruko eztabaida nabarmen astindu eta edukiz bete duelako. Estaturik gabeko nazioetan independentzia alternatiba erreal bat da, Eskoziako prozesuak indartu egin duen alternatiba. Eta Eskozian eman den eztabaida biziari esker, independentzia proiektu politiko eta sozial sendoa da, gaurko errealitateari buelta emateko eskaintza eta bide ezberdinak eskaintzen dituena.

• Guk ez ditugu ez Madrileko ezta Pariseko Gobernuak ikusten halako ariketa bat onartzen, ez dute zer eskaini ezetzak irabazi dezan, ez dute oinarri demokratikorik baietza onartzeko. Euskal Herriak erabaki dezan bertako eragile politiko, sozial eta sindikalek herriari hitza emateko bidea egin behar dugu. Atera dezagun ikasgai hori ere Eskoziatik, bertako Gobernuaren ekimenak eraman du Britania Handiko gobernuari galdeketa onartzera. Jaurlaritzari dei egiten diogu jokabide berdina har dezan.

• Garai berri bati ateak irekitzeko aukerak inoiz baino argiagoak dira. Inoizko baldintzarik onenak daude erabakitzeko eskubidearen auzia Euskal Herriak irabazteko. Nafarroan erregimena erortzen ari da, EAEn gehiengo zabalak babesten du eta Legebiltzarrean gehiengo instituzional argia dago. Ez dago aitzaikiarik, baldintzak mahai gainean daude eta nazioartean haizea aldeko dugu.

• Konpromiso politikoa eta mobilizazio soziala dira giltza. Hori horrela, erabakitzeko eskubidearen aldeko lanketa lantokietara eramango du LABek. Borroka hori sindikatuon eskutik indartzeko proposamenak egingo ditugu, iparrorratza argi, erabakitzeko eskubidea gatazka politikoak konpontzeko tresnarik demokratikoena eta eraginkorrena izatearekin batera, erabakitzeko eskubidean kokatzen delako aldaketa sozialak burutzeko aukera.

Euskal Herrian, 2014ko irailaren 19an
 

 

 

AZKEN ALBISTEAK | ÚLTIMAS NOTICIAS

Jaso Tower Craneseko langileek greban jarraitzen dute

Zuzendaritzaren borondate falta dela eta, greba eta mobilizazioen bideari jarraitu beste irtenbiderik gabe daude langileak. Gaurkoa bosgarren greba eguna izan dute, eta manifestazioa egin dute Idiazabalen barrena. Datorren asteartean (hilak 24) berrekingo diete lanuzteei, ostiralera arteko greba dagoelarik aurreikusita.

Bilboko hiribilduaren mantentze elektrikoari buruzko agiri teknikoa inpugnatu dugu, hitzarmena ez betetzeagatik

2024ko irailaren 4an, Bilboko Udalak argitara eman zituen Bilboko argiteria publikoaren eta instalazio elektriko eta osagarrien mantentze- eta kontserbazio-zerbitzuaren lizitazio berriaren agiri teknikoak. Agiri horietan, Bilboko Argiakeko 39 langile agertzen dira langile subrogagarri gisa, eta subrogazio-zerrendatik kanpo geratzen dira mantentze elektrikoko zerbitzuko obren atalari atxikitako 9 pertsonak.

Karrera profesionala guztiontzat exijitu dugu

Sindikatuak Nafarroako Parlamentuaren aurrean elkarretaratzea egin du gaur goizean helburu bikoitz bati jarraiki: batetik, ateez bestaldean izenpetu behar zen akordioa ospatzeko, zeinaren bitartez Osasunbideko 3.000 langile baino gehiagorentzako karrera profesionala onartuko baita; eta bestetik, eskubide hori bera gainerako langileentzat ere zabal dadila aldarrikatzeko. Egun historikoa dela nabarmendu dute, borroka sindikalaren beharra eta garrantzia azpimarratzearekin batera.