2024-09-20
HomeEkintza SindikalaKezkaz jaso dugu Europako Epaitegiaren irizpide aldaketa

Kezkaz jaso dugu Europako Epaitegiaren irizpide aldaketa

Europar Batasunako Justizia Epaitegiak behin behineko langileen kalte ordainen inguruko bi sententzia kaleratu ditu. Sententzia hauetan modu nabarmen batean bere garaian aitortutako diskriminazioa existitzen ez dela ebazten du, finkoak ez diren langileen kalte-ordainak finkoen kalte-ordainekin parekatu behar ez direla hain zuzen. 2016 amaieran emandako ebazpenak kontutan hartuta, 180 graduko doktrina aldaketa suposatzen du honek.

Ebazpen hauek ziurgabetasun egoera batean kokatzen dituzte milaka langile. Guztiok dakigu gaur egun lan merkatuaren ezaugarri nagusia behin behinekotasuna dela eta langile kolektibo hauentzat sekulako kolpea suposatuko du doktrina juridikoaren norabidea aldatzeak. Babes maila txikiena daukan langile kolektibo honentzat berri onak iritsi ziren Europako Epaitegietatik duela hilabete batzuk, orain ordea langile finkoekin daukaten ezberdintasuna handitua ikusiko dute zalantzarik gabe.

Iritzi aldaketa hau ordea ezin da ulertu sektore publikoan dagoen egoera kontutan hartu gabe. Atzo ateratako bi ebazpen horietako bat administrazio publikoetako kudeatzaileen buru hauste handi bat konpontzera etorri da zalantzarik gabe. Bitarteko langileak (interinoak) beraien lan harremana amaituta ikusten dutenean kalte ordaina jasotzeko aukera ez dagoela ebatzi du tribunalak, aurreko sententzietan aipatzen zen diskriminazioa existitzen ez dela esanez. Bitarteko langileez josita daude administrazioak, lanpostu estrukturalak betetzen. Urteak eta urteak ziurgabetasun egoeran eta gainera lan harremana amaitu eta kalte ordainik ez.

LABek esku beltzak ikusten ditu irizpide aldaketa honetan. Argi dago gobernuak gai honekin urduri zeudela eta Europako epaitegietatik irizpide aldaketa honen zain zeudela. Tamalgarria da gobernu ezberdinen jarrera, berriro ere langileen bizkar jartzen dute instituzioen gastu kontrola. Kasu honetan gainera, ziurgabetasunean eta babes maila baxuenean dagoen langile kolektiboaren bizkar.

Onartezina da gure ustez behin behinekotasun egoera hauek gure lan merkatuaren oinarri izatea, are eta gehiago sektore publikoan, non kontratazio eredua iruzurrezko interinitatean oinarritzen den. Susmagarria eta salagarria da Europako Epaitegiaren norabide aldaketa, administrazio merkantilistaren interesak defendatzen, lan merkatuan geroz eta gehiago diren behin behineko langileen diskriminazioa areagotzen ari dira eta.
Bukatzeko, iruzurrean dagoen behin behinekotasun egoeren kontra borrokatzeko deia egiten diegu langile guztiei. Horretarako prest dago LAB, bai sektore publiko zein eremu pribatuetan.
 

 

 

AZKEN ALBISTEAK | ÚLTIMAS NOTICIAS

Bilboko hiribilduaren mantentze elektrikoari buruzko agiri teknikoa inpugnatu dugu, hitzarmena ez betetzeagatik

2024ko irailaren 4an, Bilboko Udalak argitara eman zituen Bilboko argiteria publikoaren eta instalazio elektriko eta osagarrien mantentze- eta kontserbazio-zerbitzuaren lizitazio berriaren agiri teknikoak. Agiri horietan, Bilboko Argiakeko 39 langile agertzen dira langile subrogagarri gisa, eta subrogazio-zerrendatik kanpo geratzen dira mantentze elektrikoko zerbitzuko obren atalari atxikitako 9 pertsonak.

Karrera profesionala guztiontzat exijitu dugu

Sindikatuak Nafarroako Parlamentuaren aurrean elkarretaratzea egin du gaur goizean helburu bikoitz bati jarraiki: batetik, ateez bestaldean izenpetu behar zen akordioa ospatzeko, zeinaren bitartez Osasunbideko 3.000 langile baino gehiagorentzako karrera profesionala onartuko baita; eta bestetik, eskubide hori bera gainerako langileentzat ere zabal dadila aldarrikatzeko. Egun historikoa dela nabarmendu dute, borroka sindikalaren beharra eta garrantzia azpimarratzearekin batera.

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.