2024-09-20
HomeEkintza SindikalaUste dugu "enpresa eredu inklusibo parte-hartzailea" ez legezko proposamenak ez gaituela prekarietatea...

Uste dugu “enpresa eredu inklusibo parte-hartzailea” ez legezko proposamenak ez gaituela prekarietatea eta patronalaren aldebakartasunetik aldentzen

Bihar, irailak 27, EAEko Legebiltzarrean “Enpresa eredu inklusibo parte-hartzailea” sustatzeari buruzko ez legezko proposamena eztabaidatuko dute.

LAB sindikatuaren iritziz proposamen honen abiapuntua bera ez da egokia. Egungo lan harreman eta enpresa eredua ez ditu auzitan jartzen, ez ditu kontuan hartzen azken urteetan inposaturiko lan erreformak eta horien ondorioak. Prekarizazioa legeztatu egin da eta enpresariei sekulako boterea eman zaie. Beraz, egun Euskal Herriko enpresetan dagoen eredua, parte-hartzailea eta inklusiboa den eredu baten guztiz kontrakoa da; hiru zutabe nagusi ditu: prekarietatea, negoziazio kolektiboaren ukazioa, eta patronalaren aldebakartasuna.

LABek enpresetan langileen partaidetza ekarriko lukeen eredu bat ondo ikusiko luke, beti ere era integral batean egingo balitz, hurrengo parametroei jarraituz:

1.- Langileek ere enpresek hartzen dituzten erabakietan era erreal batean parte hartzeko aukera izatea; langileen parte-hartzea ezin da mugatu informazioa jasotzera.
2.- Enpresaren irabaziak banatzerakoan langileak ere banaketa horren parte izatea, soldatetatik harago.
3.- Akzioen bidez langileen partaidetza enpresaren jabegoan kolektiboa izatea, hau da, langile guztiena, eta negoziazio kolektiboari lotuta.
4.- Inposatzen ari zaigun prekarietate, ukazio eta aldebakarreko eredutik aldentzea.

Parlamentuko plenoan eztabaidatuko den ez legezko proposamena ez da nahikoa sindikatu honentzat. LABek ezartzen dituen lehen bi parametroak betetzeko ez du inongo mekanismo bermatzailerik jartzen, hirugarren parametroa ez da betetzen (langileen partaidetza indibiduala planteatzen du), eta laugarrena ez du aipatzen.

Sinesten dugu Arizmendiarretaren Lagunen Elkarteak duen borondate ona eredu parte-hartzaile eta inklusibo bat sortu eta martxan jartzeko, eta aintzat hartzen dugu oraingo enpresa eredu ukatzaile eta aldebakarrekoa zalantzan jartzeko eztabaida ireki izana, baina uste dugu ez dagoela patronalik ez botere politikorik eredu hau sustatzeko, eredu hau inplementatzeko prest.

Patronalak prekarietatea hedatzea beste helbururik ez du, eta erakundeen babes osoa du saiakera horretan; bihar eztabaidatu eta onartu daitekeen proposamenak dituen gabeziak ikusita, prekarietatea hedatzen jarraitzeko erabili dezake, langileen zatiketa eta indibidualizazioan sakonduz.
 

 

 

AZKEN ALBISTEAK | ÚLTIMAS NOTICIAS

Bilboko hiribilduaren mantentze elektrikoari buruzko agiri teknikoa inpugnatu dugu, hitzarmena ez betetzeagatik

2024ko irailaren 4an, Bilboko Udalak argitara eman zituen Bilboko argiteria publikoaren eta instalazio elektriko eta osagarrien mantentze- eta kontserbazio-zerbitzuaren lizitazio berriaren agiri teknikoak. Agiri horietan, Bilboko Argiakeko 39 langile agertzen dira langile subrogagarri gisa, eta subrogazio-zerrendatik kanpo geratzen dira mantentze elektrikoko zerbitzuko obren atalari atxikitako 9 pertsonak.

Karrera profesionala guztiontzat exijitu dugu

Sindikatuak Nafarroako Parlamentuaren aurrean elkarretaratzea egin du gaur goizean helburu bikoitz bati jarraiki: batetik, ateez bestaldean izenpetu behar zen akordioa ospatzeko, zeinaren bitartez Osasunbideko 3.000 langile baino gehiagorentzako karrera profesionala onartuko baita; eta bestetik, eskubide hori bera gainerako langileentzat ere zabal dadila aldarrikatzeko. Egun historikoa dela nabarmendu dute, borroka sindikalaren beharra eta garrantzia azpimarratzearekin batera.

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.