Azken urteotan askotan entzun dugun arren Eusko Jaurlaritzak Lanbide zuzenbide pribatuko erakunde publiko bihurtu nahi zuelaren zurrumurrua, Lanbideko zuzendaritzarekin izandako bileretan ez zaigu inoiz horri buruzko informazio gardena eman. Mahai sektorialetan gaiari buruz zuzenean galdetu arren, Jaurlaritzaren erantzuna hutsa izan da.
Ez da kasualitatea, gaur egungo gobernuak aldaketa hori kudeatu duen iluntasuna. Badaki bere interesei erantzuten diela eta langileei zein herritarrei emango dien zerbitzuari kalte egiten diela.
Badakigu zuzendaritzak eta Gobernuak aurrera egin dutela beren asmoan. Lege-proiektua Eusko Legebiltzarrari aurkeztu diote, eta zuzenketen eztabaidaren zain, bozketa azaroaren 23an egingo da. Lanbiderekin, zuzenbide pribatuko erakunde publiko bihurtuta, Jaurlaritzak esan du malgutasun eta dinamismo handiagoa izango dutela enplegu-politika aktiboak gauzatzeko. Hala ere, ez dute argi eta garbi esaten zer ondorio izango dituen horrek.
Lanbide zuzenbide pribatuko erakunde publikoa izanik, alde batera utziko lituzke funtzio publikoaren ia kontrol eta berme guztiak, ehunka enplegatu publikoei dagokienez. Lan-kontratuko langileak hautatzeko sistema ez hain bermatzaileak erabil litezke, administrazio batek erantzun beharreko gardentasun-, berdintasun-, merezimendu- eta gaitasun-balioetatik urrun.
Gainera, nabarmen aldatuko litzateke aurrekontu-, gastu- eta ondare-araubidea, eta alde batera utziko litzateke kontu-hartzailetzako kontrol publikoa, enpresaren kontu-hartzailetzako kontrola aplikatuz. Gardentasunik ezak eta kontrolak enplegu-programei eta prestakuntzaren azpikontratazioari eta esleipenari eragingo die, eta are gehiago irekiko du pribatizaziorako atea. Hau, larriagotu egiten da enplegua eta prestakuntza-esparruak Elkarrizketa Sozialeko Mahaian parte hartzen duten erakundeen finantzaketa-iturri bihurtuko direlako.
Kalitatezko enplegua sortzeak lehentasuna izan behar du Eusko Jaurlaritzarentzat, herritarrei eskaintzen dien zerbitzuan. Eta administrazioak enplegatzaile gisa duen zereginean, bere plantilla eta lan-baldintzak babesten direla zaindu beharko luke.
Horregatik, LABek eta ELAk uste dugu Lege-proiektu honi EZETZ esateko garaia dela. Eta aldarrikatzen dugu:
- Enpleguari buruzko Legearen VI. titulua kentzea.
- Lanbideren izaera juridikoa ez aldatzea.
- Lanbideko langileen lan-baldintzak mantentzea, erakunde autonomo gisa, Administrazio Autonomoko Mahai Sektorialean.
- Pribatizazioari ateak ez zabaltzea. Dagoeneko pribatizatuta dauden zerbitzuak lehengoratzea.
- Enplegua kontsolidatzea eta programa-kontratuen politikarekin amaitzea.
- Lanpostuak eta zereginak ondo definitzea, lan-kargak orekatuz eta langileen ongizate fisikoa eta emozionala bermatuz.
- Adierazitako aldarrikapenak lortzeko egingo ditugun mobilizazioetan parte hartzeko deia egiten diegu langileei. Azaroaren 9an, elkarretaratzea 9:00etan Bilboko Euskaldunaren aurrean eta azaroaren 10ean, elkarretaratzeak lantokietan.