Atzo, Mercedes Benzeko Zuzendaritzak eta Komiteak bilera bat burutu dute eta bertan enpresak planteatu du malgutasuna handitzeko beharra. Horren aurrean, LABek argi dauka langileak ezin dituztela prekarizatu dieseleko krisiaren aitzakiapean eta horregatik enplegua eta lan baldintzak tinko defendatuko ditu.
Atzoko bileran, MERCEDESeko Zuzendaritzak haiek egindako egoeraren azterketa helarazi digu. Horren ondorioz, Komitearen batzorde negoziatzaileari malgutasuna 26 orduz luzatzea planteatu diote, -170 ordutara, suspentsio ERTE bat ekiditzejo asmoz.
Horren guztiaren aurrean, LABek argi eta garbi adierazi nahi du aipatzen diguten Diesel krisia ezin dela langileen bizkar gainean erori. Izan ere, azken aste hauetan jakin izan dugu MERCEDESek 132.000.000 €ko etekinak izan zituela iaz (delako krisia zabalduta zegoenean), 269.000.000€ banatu zituela dibidendoetan eta produkzioa handitu zuela aurreko urtekoarekin alderatuta. Horrekin batera, aste honetan bertan Alemanian DAIMLERri 870.000.000€ko isuna ezarri diote ibilgailuen isurketaren datuak manipulatzeagatik (hauxe gure lantegiko zuzendariak tinko ukatzen zuen duela zenbait aste eta orain Taldeak onartzen du).
Beraz, gure ustez langileei ezin zaizkie lan baldintzak okertu, ezin zaiela prekarizatu eta langileek ezin dituzte MERCEDESen jokabide okerrak edota irregularrak ordaindu. Hori dela eta, LABek langile guztien enplegua aldarrikatzen du eta beraien lan eskubideak tinko defendatuko ditu (Mercedesekoak zein enpresa hornatzaile eta azpikontratetakoak) bai oraingo neurrien aurrean, baita etorkizunean etor daitezkeen mehatxuen aurrean ere.
LABen helburua langileen lan baldintzak hobetzea da eta asmo horrekin lan egingo dugu prozesu honetan zehar.