Mendaroko ospitaleko mantenimenduaren ardura dauka Tecman enpresak. Bertako langileek greba mugagabea hasi dute gaur, hitzarmen duinaren alde eta enpresaren ez-betetzeen aurrean. Guztiek egin dute bat deialdiarekin. Gaur goizean, mobilizazioa egin dute Mendaroko ospitalean.
LANGILEEN OHARRA
Tecmaneko langileak greba mugagabean enpresaren ez betetzeen aurrean
Mendaroko ospitalean, Tecman SVA S.L. enpresan dihardugun langileok azken bi hilabetetan jazo diren gertakariak eman nahi ditugu aditzera.
Denok dakigunez, Tecman SVA S.L. enpresak 2019ko maiatzaren batean ekin zion bere zereginari Mendaroko ospitalean; egia bada ere bi hilabete “besterik” ez dela igaro orduz geroztik, hasiera ezin okerragoa izan da.
Aipatu zerbitzuaren mantentze-osoa kontratatzeko preskripzio teknikoen pleguan, ondorengoa irakur daiteke: “Enpresa esleipenduna subrogatuko da eskubidetan eta betebeharretan, egun kontratatua dagoen enpresaren mantentze-lanak egiten dituzten langileei dagokienez”. Gaur egun, enpresak ez du plegua betetzen.
Hainbat aste jo ta ke borrokan aritu ondoren, lan egutegi eta oporretarako egunak zehaztea lortu dugu. Hala ere, ez da nahikoa. Izan ere, enpresak ez du plegua betetzen, nominaren egitura alde bakarreko erabakiz aldatu da, bajak ez dira aurreikusten, zaintzari lotu ordainsaria hutsaren hurrengoa da Osakidetzako langileek dutenarekin alderatuko bagenu, ez digute langileen artean komunikatzeko gailurik ematen, ez dira pleguak zehazten duen langile kopurua betetzen, gure soldata KPIaren gainetik eguneratzea nahi dugu, kontratu motekin eta antzinatasunekin arazoak ditugu,… Ez dezakegu ahantz lankide bat arbitrarioki egotzia izan dela, eta horren harira, lanari berehalaxe ekin diezaiola eskatzen dugu.
Erantzunik gabeko hainbat bilera eta proposamen egin ostean, langileon asanbladak uztailaren 2tik aurrera greba mugagabera deitzea erabaki du. Aipatutako greba deialdiaren ondorioz, enpresak bilera batera deitu gintuen. Baina bilera horretan hainbat gai jorratu arren, ez zuten inolako konpromisorik hartu.
Bilera hori eta gero, langileek egoera hau desblokeatze aldera, bi proposamen egin ditugu enpresa-hitzarmen batean jazo zitezen. Horrexegatik, behartuak gaude Mendaroko Ospitalean jazotzen ari dena ezagutaraztera.
Ez dugu ahaztu nahi ere Osakidetzari dagokion ardura, kontratugilea delako; jadanik adierazi zaio Tecman SVA S.L. enpresa plegua ez dela betetzen ari.
Horrengatik, Tecman SVA S.L. enpresaren zuzendaritza eta Osakidetza bera deitzen ditugu, jazotzen ari den guztiari irtenbide duina eman diezaioten.
Amaitzeko, adierazi nahi dugu ez dugula onartuko gure eskubideak ez errespetatzea, gure lan baldintzak kaskar daitezela, ez dugula atzera pausurik emango, eta Mendaroko Ospitalean diharduten Tecman SVA S.L.-ko langileek hitzarmen duina izan dezaten borrokatuko garela.
Bizitza duina, hitzarmen duina!
Tecmaneko langileak borrokan!