Azken hilabeteetan, LABek Goieki (Goierriko Garapen Agentzia) eskualdean bultzatzen ari den biometano plantari buruzko proiektua ezagutu du. Olaberriako Arcelor Mittal enpresak eta Beasaingo CAFek duten energia kontsumoarekin lotutako proiektua da. Horregatik, enpresa horietako bere ordezkari sindikalekin batera lan egin du LABek, eta proiektuari buruzko informazioa eskatu du, bai prozesu produktiboetan duen integrazio teknologikoari buruz, eta baita enpresetako lanaren antolaketaren inguruan izan ditzakeen ondorio posibleei buruz ere.
Proiektuaren deskribapenak gas fosilaren erabileraren zati bat biometanoagatik ordezkatzea aurreikusten du bi fabriketan. Horrek aurrerapena ekarriko luke industria horien deskarbonizazioan, nahiz eta oraindik partziala izan; bereziki, Olaberriako ArcelorMittal kasuan. Hala ere, kezka iturri diren elementuak daude. Plantak funtzionatzeko behar duen materia organikoaren bolumenak askogatik gainditzen ditu eskualdeko abeltzaintza eta hiri hondakinak. Beraz, kopuru horiek dozenaka kilometrora dauden beste leku batzuetatik ekarri beharko lirateke. Horrekin batera, prozesuaren amaieran sortuko diren hondakinen bolumena ezingo luke eskualdeko lurraldeak xurgatu. Horrek proiektu osoari buruzko eztabaida irekia eta gardena izatea eskatzen du. Prentsan edo bilera batzuetan jasotako zenbait informaziok ez dute elementu horietako bat bera ere jasotzen.
LABek uste du trantsizio ekosoziala planifikazioarekin eta langileen parte hartze demokratikoarekin egin behar dela. Industriak duen eraldaketa energetikoa gatazka sindikalaren espazio gisa ikusten du LABek. Dimentsio honetako proiektuak modu gardenean aurkeztu behar zaizkie eskualde osoari eta zuzenean horien eraginpean dauden langileei. Horregatik, hurrengo pausoak ezin dira informazio partzialekin eman. Maila instituzionalean zein lan zentroetan, proiektuari buruzko informazio eta eztabaida kolektiborako espazioak ireki behar dira. Bi kasuetan langileen parte hartze loteslea aitortu behar da. Horrela, eskualdearen etorkizuna, bere enplegu industriala eta trantsizio ekosoziala lehiatu ahal izango ditugu.