Oldarraldi judiziala hedatzea eta larriagotzea dakarren epai berria ezagutu dugu. Duela egun gutxi, EAEko Justizia Auzitegi Nagusiak lanpostu publikoen hizkuntza eskakizunak kolokan jartzeko Espainiako Auzitegi Konstituzionalera jo zuela ezagutu eta gero, gaur, auzitegi berak administrazio publikoarekin lan egin ahal izateko enpresek euskararen gutxieneko erabilera izan beharra atzera bota duela jakin dugu.
Jendarte berdinzaleago eta hobe bat lortzea helburu, beste hainbat eremurekin egiten den bezala (ingurugiroaren zaintzarako edo genero berdintasuna lortzeko klausulak ezarrita, adibidez) euskararen erabilera eremu sozioekonomikoan sustatzeko hizkuntza-klausulak dira epaitegiak atzera botatakoak. Hau da, euskararen sustapena bide horretatik egin ahal izatea ukatzen zaie administrazioei. Are larriago, klausula horien bidez une honetan sustatu nahi dena enpresek euskararen gutxieneko erabilera egitea da. Ez dira iristen espainierak duen eskakizun maila bera ezartzera, baina, azpitik egonda ere, are gehiago azpiratu nahi dute euskara. Epaile eta eragile euskarafoboek argi uzten dute, etengabe, ez dutela nahi euskara normalizatua izango duen eta espainieraren maila berean onartua izango den jendarte bat. Euskarak menpekotasunean, bigarren mailan, jarrai dezan nahi dute.
Hori horrela, LABek gogor salatzen du EAEko Justizia Auzitegi Nagusiaren epai berri hau. Beste behin, agerian geratu da epaileak dagozkien eskumenetatik harago doazela, eta, euskal herritarron gehiengoaren eta eragile soziopolitikoen gehiengoaren borondatearen aurka, euskararen aurkako hizkuntza politika egiten dutela, modu kontziente eta militantean.
Euskararen normalizazioaren aurkako epai larri honen aurrean, LABek dei egiten die herritarrei eta langileei euren eskubideen defentsan mobilizatzen jarraitzera, eta bat egiten du epaiari erantzuteko datozen egunetan deituko diren mobilizazioekin. Era berean, euskal gehiengo sindikalak datozen aste eta hilabeteetarako administrazio publikoan deitu dituen mobilizazioak indartzera dei egiten du; horien artean, abenduaren 16an Iruñean eta abenduaren 17an Gasteizen egingo ditugun mobilizazioak.