Atzo jakin izan genuen, Marcillan, Exkal enpresan 25 urteko langileak hil egin zela, elektrikari lanak egiten ari zenean.
Lehenik eta behin, LAB sindikatutik gure elkartasuna eta babesa adierazi nahi diogu hildako langilearen senide eta gertukoei momentu gogor hauetan.
Langile honen heriotzaren arrazoiak ikertzea eskatzen dugu, baita ere bere lan baldintzak eta laneko erritmoak.
Hasi berri dugun 2019 urte honetan, hiru langile hil dira jada lanean edo lanaren ondorioz. Salatu beharra dugu istripu hilgarriak handitzen ari direla behin ekonomiaren jarduera berreskuratu zenetik, horrela 2013tik hona 308 langile hil dira lanean. Datu hauek adierazten digute lan istripuak ez direla kasualitatez sortzen eta arazo estruktural baten aurrean aurkitzen garela .
Lan istripu guztien atzean lan baldintzak daude. Erritmo azkarrek, presioek edo autoritarismoak gaixotasun ezberdinak sortarazten dituzte eta hainbatetan heriotzera eramaten gaituzte.
Argi daukagu lan istripuak, izan traumatiko edo ez traumatikoak, ez direla kasualitateak sortutakoak, ematen diren lan harremanen, prekarizazioaren eta lan baldintzen okertzearen ondorio zuzena baizik.
LABen argi dugu bizi eta lan duinak behar ditugula, lanetik onik eta bizirik bueltatzeko eskubidea dugula. Sarraski honekin bukatzeko bide bakarra borroka eta antolakuntza dira, lan harreman eta joku arauen aldaketa batetik etorriko delako aldaketa. Eredu berri bat gauzatu behar dugu, enpresen irabazi ekonomikoen aurretik langileon bizitza eta osasuna lehenetsiko dituena. Horregatik LABek dei egiten du langile guztientzako lan baldintza duinen aldeko borroka egitera.