Gaur egin da Akordio Interprofesionalaren Batzorde Paritarioaren bilera. Bertan, atzo iragarri bezala, estatalizazioaren kontra, bertoko hitzarmenen eta negoziazio kolektiboaren aldeko ebazpen bat egitea proposatu du LABek. Alde guztiak ados agertu dira Akordio Interprofesionalari legezkotasuna eta zilegitasuna aitortzen, eta demanda erretiratu beharko luketeela adierazi dute.
Hala ere, edukietan harago joateko proposamenaren aurrean, ez da posible izan adostasun bat lortzea, ez delako akordiorik egon ebazpen bat ateratzeko.
Alde batetik, nahiz eta gure hitzarmenen lehentasuna berretsi, CCOOk eta UGTk ez dute zehazki errestauraziokoa aipatu nahi izan, argi utziz, orokorrean lehentasuna defendatu arren, sektorez sektore negoziatzeko debekuak eta murrizketak inposatzen dizkigutela Madriletik. Bi sindikatu hauek publikoki bertoko hitzarmenen lehentasuna defendatzen dute, baina Estatu mailako hitzarmenetan bertan negoziatzeko dugun eskubidea urratzen dute debeku eta murrizketekin, argi utziz Estatu mailako negoziazio eremuaren aldeko apustua dela eurena.
Bestetik, arazoak egon dira CONFEBASK, UGT eta CCOOen partetik, bertan injerentziarik gabe negoziatzeko dugun eskubidea aitortzeko.
Hurrengo egunetan mobilizazioekin jarraituko du LABek, estatalizazioaren kontra eta Lan Harremanetarako Euskal Esparrua eta erabakitzeko eskubidearen defentsan, eta Akordio Interprofesionalaren inpugnazioaren kontra. Apirilaren 20an, Araba, Bizkaia eta Gipuzkoako enpresa banatan egingo ditugu mobilizazioak, eta apirilaren 24an, Akordioaren inpugnazioaren epaiketa egunean ere mobilizatuko da sindikatua.