LABeko Nazio Komiteko ordezkariek eskubide sozialen aldeko manifestazioan parte hartzeko deia luzatu dute. Euskal Herriko Eskubide Sozialen Kartak deitutako mobilizazioa Bilbon izango da larunbatean, 17:30ean, Jesusen Bihotzetik abiatuta. Diru-sarrerak Bermatzeko Errentari eta Lanbidek kudeatutako gainontzeko prestazioei Lanbide-arteko Gutxieneko Soldatak izan duen %8ko igoera aplikatzea aldarrikatuko dugu, besteak beste. Era berean, 2017rako Eusko Jaurlaritzaren aurrekontu proiektuan jasotako xedapen gehigarrian prestazio sozialen zenbatekoan ezartzen den %7ko murrizketa eraginik gabe uztea eskatuko dugu.
Larunbateko manifestazioak atxikimendu ugari jaso ditu egunotan. Hainbat gizarte eragilek agerraldia egin zuten asteartean, mobilizaziorako deia luzatzeko. Ostegunean, berriz, euskal gehiengo sindikalak egin zuen bat protestarekin.