Bilera honetan LAB, ELA, CCOO eta UGT sindikatuok hartu dugu parte, baita enpresari elkarteek ere: Confebask, Euskal Herriko Ostalaritzako Federazioa, Gipuzkoako Ostalaritzako Elkartea, Gasteizko Ostalaritzako Elkartea, Bizkaiko Ostalaritzako Elkartea eta Garen.
LABek EAEko langileak lan erreformaren aurrean babestuko zituen Akordio Interprofesionala lortzeko eta gaur egun pairatzen dugun estatalizazioa ekidingo zuen negoziazio kolektiboko gure esparrua blindatzeko egin ziren bi saiakeretan parte hartu zuen. Bi saiakerak Confebasken jarreragatik geratu ziren bertan behera. Honek, herri honetako langileen prekarizazioa bilatzen zuen soilik.
Ondoren, LABek Merkataritza eta Garbiketa sektoreetako akordio markoak negoziatzeko mahaien osaketa bultzatu zuen. Era berean, sindikatu honen borondatea prekarietatea nagusi den beste sektoreetan ere bultzatzea zen, hala nola ostalaritzan. Hitzarmen guztiak blindatzeko saiakeraren porrotaren aurrean, sektore bakoitzean langileen lan baldintzak bildatzeko aukera zabaltzea zen asmoa. Negoziazio hauek enpresa elkarte zein gainontzeko sindikatuek baztertu zituzten.
LABek positiboki baloratzen du mahai hau estatalizazioa eta Confebaskek bultzatutako prekarizazio prozesua galgatzea ahalbidetuko duten edukiz osaturiko hitzarmen propioak lortzeko mekanismo gisa. Negoziazio mahai honetan parte hartzeko eskubidea dutenen artean hitzartutako datorren bileran ere izango gara. Datorren bilera 2016ko azaroaren 11an egingo dugu 11.30ean Lan Harremanen Kontseiluan.