Urte honetan zehar Mendialdeko Mankomunitateak (Larraundik Goizuetaraino eremua hartzen duena) eta langileak hitzarmen berri bat negoziatzen aritu dira, baina hauek ez dute langileentzako aski fruiturik eman oraindik. LABetik salatu nahi dugu Mankomunitateak ez duela hitzetatik ekintzetarako urratsa eman eta azken momentuan gotortu egin dela hasierako posizioetan.
Langileen proposamena hiru zutabetan oinarritu da:
- Enplegu Publikoaren sustapena lanpostu berri bat sortzen. Izan ere, zabor bilketan aritzen garen langileek lan karga handiak ditugu eta horren justua da plantilla non zailtasunak ditugu ordu sindikalak, egun propioak edota oporrak hartzeko.
- Lan Osasunaren garapena. Arlo honetan bilatzen da arriskuen identifikazio zehatza eta horiek arintzeko edota ezabatzeko lan bat, langileek epe ertainean jasan ditzakegun kalteak ekiditeko.
- Eta baldintza ekonomikoen hobekuntza. Mankomunitate honetan ditugun ordainsariak sektore honetan langile gehienek dituztenetik urrun baitaude. Ordainsarien atalean, lan beraren truke soldata bera irabaztea da gure aldarrikapena, parekatzea alegia.
Bilera asko egin eta gero negoziazioak ez du aski fruiturik eman langileentzat. Negoziazio prozesuan elkarrizketa sakona egon da eta elkar ulertze nabarmena ikusi dugu langileok, Mankomunitateak onartzen baitu langileek egiten dugun lan handia eta ona eta zerbitzu honen kalitatea. Baina elkar ulertze hau ez da gauzatu akordio batean: Mankomunitateak ez du onartzen lanpostu publikoa sortzea, nahiz eta etorkizun batean sortzeko asmoa agertu; adostasuna agertzen du Lan Osasunaren inguruan, hau izanik onartzen duen proposamen bakarra; eta ordainsarien atalean azkenik, soldata igoera bat proposatu arren ez du onartzen langileoi parekatzea dagokigunik, beraz, ez du onartzen beste mankomunitateetan dauden ordainsariekin parekatzea.
Langileon ustez, Mankomunitatea ez da apenas mugitu beren hasierako planteamenduetatik, mantentzen dute ia-ia hasierako jarrera, nahiz eta langileok ahalegin bat egin dugun tarteko proposamenak luzatuz eta enplegu berriaren justifikazioa arrazoiaz eta funtzioaz betetzen akordio batera ailegatu ahal izateko.
Salatu nahi dugu Mankomunitateak ez duela hitzetatik ekintzetarako urratsa eman eta azken momentuan gotortu dela hasierako posizioetan.
Mendialdeko Mankomunitateko LABek segituko du zilegiak diren aldarrikapenak defendatzen.