Gaur, Euskal Sistema Publikoaren aldeko eta Kutxabanken pribatizazioaren aurkako plataformak aurkeztutako mozioa aurkeztu da Bizkaiko Batzar Nagusietan. Bien bitartean, kontzentrazioa egin dute kanpokaldean. Mozio honetan euskal kutxen likidazio eta bankarizazio prozesua bertan behera uztea eskatuko da. Horrez gain, fundazio bankarioen esku dauden Kutxabanken akzioak aurrezki kutxen fundatzaileen esku uzteko eskatuko da, besteak beste, Bizkaiko Foru Aldundiaren esku.
Gure ehun produktiboa defendatzeko baliabide guztien beharra dugun honetan, pertsonen eta enpresa txiki eta ertainen beharrizanei aurre egin behar zaien honetan, ezin dugu onartu gutxi batzuek kutxen likidazioa aurrera eramatea eta Kutxabanken akzioak inbertsore pribatuen esku uztea.
Gure aldarrikapena, Europako beste herrialde batzuetan gertatzen den bezala, Kutxek bere izaera publiko eta soziala mantentzea da; alegia, euskal sistema finantziero publikoa sortzea zeinen oinarrian kutxabank osatzen duten euskal kutxak dauden.