Bizkaiko metalgintzako langileek protesta egin dute Ortuellako Tecuni enpresa aurrean, hitzarmen duin baten defentsan, LAB, CCOO, UGT, ESK, CGT eta CNT sindikatuok deituta. Enpresa honetako arduraduna Tamara Yague da, FVEM patronaleko presidentea ere badena. Hori dela eta hurbildu gara bertara, langileen aldarriak bertatik bertara entzun ditzan.
LABeko Industria sektoreko arduradun Iratxe Azkueren hitzetan, “hitzarmena blokeatzen jarraitzen duten bitartean, euren enpresak blokeatuko ditugu”. Hala, ekimen baketsuaren kontra Ertzaintzak erabilitako bortizkeria salatu du: “Hau da, hemen ikusi duguna, Eusko Jaurlaritzaren eskaintza metalgintzako langileentzat? Bortizkeria?”.
Borroka dela bidea nabarmendu du, patronalak negoziazioan eduki duinak proposatu ditzan. Hori egin ezean, datozen egunetarako iragarritako grebekin aurrera jarraituko dugula berretsi du.