Iritziak eta kezkak partekatzeko helburuarekin sindikatuak bilera batera deitu gaituzte gaur arratsaldeko 17:00etan San Telmo Museoko Liburutegian, Donostian. Deialdia Europar Batzordeko Espainiar Estatuko ordezkariek egin dute. TTIP eta Europar Batasuna eta Estatu Batuen arteko beste merkataritza libreko itunak izango ditugu aztergai.
ELA eta LABen iritziz, itun hauen sozializazio eta partekatze bezala saldu nahiko dute hauen aldekoek. Berandu dabiltza, dagoeneko itxita dutenean datoz kaltetuenak izango garenongana. Ez dugu horrelako parte hartze faltsurik onartzen. Gure parte hartzea bilera honetan guztiz kontra gaudela adierazi eta salaketa egiteko erabiliko dugu.
Europar Batasunak presa dauka momentu honetan, izkutuan burutu dituzten negoziazioak bere azkenera heltzen ari dira. Merkel eta Obamaren argazkiak, Estatu Batuetako hauteskundeak izan aurretik dena lotuta nahi dutela adierazten du. Gure herrian ez dugu argazki horren parte izan nahi.
Merkatuen mesedetan, gure oinarrizko eskubideak oraindik gehiago kaltetuko dituzte, gure osasun eta ingurumenaren kaltetan, gure lan baldintzen kaltetan eta gure burujabetzaren kaltetan. Itunok sinatzen dituztenetik aurrera, langileon, eta orohar herritarron bizi baldintzek okerrera egingo dute.
Behin bilera bukatuta, arratsaldeko 19:00etan, jardunaldia izango da. Horretan ere presente egongo gara itunen aurrean aurka zergatik gauden azaltzeko. Era berean, kalean ere egongo gara eta Gipuzkoako TTIParen aurkako kanpainak deitu duen elkarretaratzean parte hartuko dugu.
Europar Batzordeko kideekin izango dugun bileran, Euskal Herriko Eskubideen Karta Sozialaren asanbladak antolaturiko Alternatiben herrian onarturiko “TTIP eta TISAren mehatxuari aurre egiteko, herrien elkartasuna, bestelako mundu bat posible da” manifestua helaraziko diegu. Manifestu hori ohar honekin atxikita duzue.